31 мая 2014 г.
Кирек хăш халăх та сăмахăн асамлă хăватне авалтанах ĕненсе пурăннă. Паянхи кун та Шĕмшеш ял тăрăхне кĕрекен Писенер халăхĕ ĕлĕкхи йăла-йĕркене тытса пырать. Кашни çулах ял-йыш пĕрле пуçтарăнса ял сăри ирттерет, пăтă çиет. Ватă çынсем чиркĕве кайса Турăран ырă пурнăç, тулăх тырă-пулă, апат-çимĕç туса илме çумăр, лайăх çанталăк, усал-тĕселсене аякка сирме ыйтаççĕ. Уя тухса парне параççĕ, кĕл тăваççĕ. Ял варрине пухăнса пăтă çиеççĕ, сăра ĕçеççĕ. Клуб директорĕ Татьяна Игнатьева халăха пĕрле пухма яланах хавас. Çавăн пекех Надежда Архипова, Валентина Никифорова йăла-йĕркене çирĕп тытса пыраççĕ. Ял старости Андрей Архипов пур енĕпе те пулăшу парать. Пăтă çинĕ хыççăн пурте пĕр-пĕрне шывпа сапрĕç. Уява ваттисемпе пĕрлех ачасем те хаваспах хутшăнчĕç.
И.ИВАНОВА.