25 июня 2014 г.
Районти хуçалăхсенче выльăх апачĕ хатĕрлес енĕпе ĕçсем сарăлсах пыраççĕ. Июнĕн 23-мĕшĕ тĕлне илсен, нумай çул ÿсекен курăксене 1581 гектар çулнă.
Утă 250 тонна типĕтсе хатĕрленĕ. Сенаж 3000 тонна хывнă.
«Новый путь» хуçалăхра выльăх апачĕ хатĕрлессипе ĕçсем вĕçленсе пыраççĕ. Кунти фермăсенче сенаж 2200 тонна янтăланă.
«Алмаз», «Правда» хуçалăхсенче те иккĕмĕш ĕççи ăнăçлă пырать. Вĕсем хĕл кунĕсенче выльăх апачĕ ытлă-çитлĕ пуласса шанса вăй хураççĕ.
Ял хуçалăх культурисене агротехникăна пăхăнса пĕлсе ÿстересси те тĕп вырăнта. Çĕр улми уйĕсенче яра куна ĕç вĕрет. Ретсем хушшине кăпкалатса çемçетеççĕ, минераллă удобренисемпе апатлантараççĕ, чир-чĕрсемпе хурт-кăпшанкăсене хирĕç те кĕрешеççĕ.