Публикации » Грипран прививка тăваççĕ

07 сентября 2018 г.

2018 çулхи августăн виççĕмĕш вунăкунлăхĕнче Раççейре грипп чирĕнчен сыхланас тĕлĕшпе прививка тумалли тапхăр пуçланнă. Прививкăна эпидеми вăхăчĕ пуçланиччен 1-1,5 уйăх маларах тăваççĕ. Асăннă препарат усă кÿтĕр тесен вакцинăна çын сывă тата вăраха кайнă чирсем систермен чухне тума сĕнеççĕ. Вăхăтра прививка туни грипран сыхланипе пĕрлех çавăн йышши ытти чирсене те çăмăллăнах парăнтарма пулăшать.

Çÿлерех палăртнă тапхăр тĕлне Элĕкри тĕп больницăна та хамăр çĕршыврах туса кăларакан «Совигрипп» вакцина илсе килнĕ. Асăннă препарат тĕрлĕ грипа хирĕç кĕрешме май парать. Прививка тума хăйсем пурăнакан вырăнти участок врачĕ патне каймалла.