00:00 16 февраля 2011 г.
Никам та хирĕçлеймĕ: сывлăх пурнăçра чи хакли – ăна ылтăнпа та туянаймăн. Çак каларăшăн пĕлтерĕшне районти нумай çын «Раççей йĕлтĕр йĕрĕ – 2011» массăллă чупăва хутшăнса çирĕплетрĕ. Вĕсемшĕн пурнăç савăнăçĕ эрех-сăрара мар, шăпах уçă сывлăшра пулнинче. Йĕлтĕр спортне юратакансен тупăшăвне кăçал 500 ытла çын хутшăнчĕ.
Кăçалхи сывлăх уявĕ нарăсăн 13-мĕшĕнче шăп 12 сехетре уçăлчĕ. Спортпа туслисене Чăваш Республикин Патшалăх Канашĕн Председателĕн çумĕ В.Мидуков, район администрацийĕн пуçлăхĕ Л.Читнаев ăнăçу сунчĕç, «Раççей йĕлтĕр йĕрĕ» спорт уявĕ пулнине, çавна май кĕлеткене пиçĕхтерме май пуррине палăртрĕç.
Чи малтанах старта чупăва хутшăнакансем тухрĕç. Арçынсен ушкăнĕнче Питĕшкасси шкулĕн директорĕн çумĕ В.Андреев, Элĕк шкулĕн директорĕ В.Волков, Шĕмшеш шкулĕн директорĕ А.Чернов лайăх кăтартусем турĕç. Хĕрарăмсенчен ку ушкăнра Тени ял тăрăхĕн пуçлăхĕ Г.Мурзакова пĕрремĕш вырăн йышăнчĕ. Иккĕмĕшпе виççĕмĕш вырăнсене Тавăт ял тăрăхĕн пуçлăхĕ С.Железновăпа Карачурари шкул директорĕн çумĕ С.Осипова пайларĕç. Вĕсем хыççăн эстафетăна шкулта вĕренекенсем йышăнчĕç. Арçын ачасенчен Павел Павлова (Элĕк шкулĕ) çитекенни пулмарĕ. Хĕр ачасенчен Татьяна Иванова (Элĕк шкулĕ) мала тухрĕ.
35-44 çулсенчи хĕрарăмсем хушшинче Ураскилт ял тăрăхĕнчи Валентина Убасева финала пĕрремĕш çитрĕ. Тенири Клара Мурзаковăн иккĕмĕш кăтарту. 40-59 çулсенчи арçынсем хушшинче Ураскилтри Сергей Филиппов малти вырăна йышăнчĕ. Иккĕмĕшĕнче – Йăлкăшри С.Петров, виççĕмĕшĕнче – Карачурари С.Михайлов. 45 çултан аслă хĕрарăмсенчен Мăн Вылă ял тăрăхĕнчи Ирина Федорова палăрчĕ. Чи асли – Элĕк салинче пурăнакан 79 çулхи Никита Ларионов пулчĕ.
Мала тухнисене дипломсемпе тата парнесемпе чысларĕç.