00:00 10 сентября 2011 г.
Районти культурăпа кану центрĕнчи «Пучах» агитбригада çĕнĕрен те çĕнĕ шыравсем шыраса тупать, ялсене тухса çÿресе юрă-ташăпа савăнтарать, çĕршывăмăрта, республикăра, районта пулса иртекен хыпарсемпе паллаштарать.
«Пучахсем» çак кунсенче Вăрманкасра пулнă. Ку ялта чăвашсен пултаруллă поэчĕ, Тăван çĕршывăн Аслă вăрçинче тăшмана хирĕç пăшал тытса çапăçнă Максим Ястран çуралса ÿснĕ. «Пурнăçа юратса» программа пурне те тыткăнланă. Концертра ентешĕмĕрĕн сăввисем те янăранă.
«Пучах» агитбригада ĕмĕр-ĕмĕрлесе 100 çул тултарнă, халĕ Элĕк салинче пурăнакан Анна Быковăна та юрă-ташăпа савăнтарнă. Вĕсемпе пĕрлех юбиляра çывăх çыннисем чун-чĕререн саламланă, телей суннă.
Г.ПЕТРОВ.