00:00 14 сентября 2011 г.
Инкек «Новый путь» хуçалăхăн Шуркасси ферминче пулнă, унта пушар тухнă май 44 пăру çуннă.
Вут-çулăм хыпса илнĕ чух хуралçă çывăхра пулман. Пушар çутине ăнсăртран кÿршĕ ял çынни асăрханă. Пушар хуралĕн ĕçченĕсем инкек пирки шăнкăравласа пĕлтернĕ хыççăн 6 минутранах çитнĕ пулин те выльăхсен пĕр пайне упраса хăварма май килмен (витере пĕтĕмпе 130 пăру пулнă – вĕсене унта кăкаркăçра тытнă).
Выльăхсен пысăк йышне çăлса хăварнăшăн вара ял çыннисене тав тумалла. Вĕсем МЧС машинисем килсе çитичченех çунакан фермăран 86 пăрăва илсе тухма пултарнă. Чăннипе, паттăрлăх кăтартнă теме те юрать: выльăха çăлнă май икĕ арçынпа пĕр хĕр тĕтĕм-сĕрĕмпе сывласа сиенленнĕ, тепĕр çын ÿтне пĕçертнĕ. Тăваттăшне те районăн тĕп больницине ăсатнă.
Н.ДМИТРИЕВ.