00:00 05 декабря 2011 г.
«Хĕлхем» физкультурăпа спорт комплексĕнче сывлăх тата ÿт-пÿ тĕлĕшĕнчен хевтесĕр çынсем хушшинче спорт фестивалĕ иртрĕ. Ăна Пĕтĕм тĕнчери инвалидсен кунне халалланă.
Çак хаваслă та питĕ пĕлтерĕшлĕ спорт фестивальне райадминистрацин социаллă хÿтлĕх пайĕ тата Пĕтĕм Раççейри инвалидсен обществин районти организацийĕ йĕркелерĕç. Ăмăртусене уçнă чухне район администрацийĕн пуçлăхĕ Л. Читнаев, Муркашри чăх-чĕп фабрикин генеральнăй директорĕ Н. Ванеркин, Пĕтĕм Раççейри инвалидсен обществин районти организацийĕн ертÿçи Г. Деомидов салам сăмахĕсем каларĕç.
Инвалид-спортсменсем теннисла вылярĕç тата дартс сăннисене тĕл ывăтассипе тупăшрĕç. Ăмăртусене 10 çулти ачасенчен пуçласа 60 çула çитнĕ инвалидсем хутшăнчĕç. Çакăнтах хевтесĕррисем ăсталанă ал ĕç япалисене те курма пулчĕ.
В.ГЕННАДЬЕВ.