00:00 10 декабря 2011 г.
Элĕкри ачасен искусство шкулĕнче тăтăшах класс тулашĕнчи мероприятисем, концертсемпе сцена вăййисем иртеççĕ. Анчахрах фортепиано класĕнче «Тăван юрă-кĕвĕ» черетлĕ концерт иртнĕ. Программăра халăх кĕвви-çеммисем çеç мар, композиторсем хайланă юрăсем те янăранă. Фортепиано класĕн преподавателĕшĕн Н.Павловăшăн та, концерта хутшăнакансемпе курма пынисемшĕн те кăсăкли нумай пулнă. Виççĕмĕш класри Ирина Петухова, акă, хăйне майлă пĕтĕмлетÿ тунă. Вăл шутланă тăрăх, музыка пĕр çынна кăна мар, Çĕр çинче пурăнакансене пурне те кирлĕ.
Концертра тĕрлĕ халăх юррисем янăранă. Иккĕмĕш класра вĕренекен Д.Семенова «Çĕмĕрт çеçки çурăлсан» чăваш халăх юррине хавхаланса шăрантарнă. Словенсен «Кÿлĕ хĕрринче» юррине И.Попова юрланă. Çавăн пекех И.Петуховăпа Д.Семенова вырăс халăхĕн «Уйăх çутатать» («Светит месяц») юрра хавхаланса шăрантарнă, М.Иванова украинсен юррипе савăнтарнă.