00:00 24 марта 2012 г.
Пуш уйăхĕн 22-мĕшĕнче «Хĕлхем» физкультурăпа спорт комплексĕнче республика шайĕнче йăлана кĕнĕ Элĕк район администрацийĕн пуçлăхĕн парнисемшĕн бокс енĕпе ирттерекен 15-мĕш турнира савăнăçлă лару-тăрура уçрĕç. Ăмăртусене хамăр республикăри хуласемпе районсенчи тата Тутарстанри, Мордови, Чулхула облаçĕнчи, Мари Элти 170 çамрăк спортсмен килсе çитнĕ.
Çамрăк боксерсен турнирне уçнă çĕре район администрацийĕн пуçлăхĕ Александр Куликов, хăвăрт утассипе тĕнче класлă спорт мастерĕ, виçĕ хутчен СССР спорт мастерĕ, СССР тата РФ тава тивĕçлĕ тренерĕ Виктор Семенов (пирĕн ентеш – Мăн Вылăран), ăмăртусен тĕп судйи – тĕнче категориллĕ судья, тĕнче тата СССР чемпионĕ Валерий Львов тата ыттисем хутшăнчĕç.
Район администрацийĕн пуçлăхĕ А.Куликов боксерсемпе хăнасене ăмăрту пуçланнă ятпа ăшшăн саламларĕ, спортсменсене рингра ăнăçу сунчĕ. Çакна палăртма кăмăллă: элĕксем 15-мĕш хут республикăри тата кÿршĕ регионсенчи боксерсене тараватлăн йышăнаççĕ. Паян финалти вăйăсем иртеççĕ.