00:00 07 апреля 2012 г.
Тĕп хуламăрта – Шупашкарта ачасемпе çамрăксен вокал тата хореографи ушкăнĕсен Пĕтĕм тĕнчери пултарулăх фестивалĕ иртнĕ. Унта Элĕкри ача-пăча искусство шкулĕнче вĕренекенсен «Ладушки» ансамблĕ те хутшăннă. Ку ансамбле чылайранпа Ираида Терентьева ăста та пултаруллă ертсе пырать.
Элĕксем конкурса халăх ташшипе тата чăваш хĕрĕсен ташшипе тухнă. Тупăшакансем хушшинче питĕ вăйлă коллективсем пулнă. Акă «Эскитон» ансамбль ташăçсен пĕтĕм тĕнчери чемпионатĕнче 19 хутчен çĕнтернĕ.
Пирĕн ентешсем сумлă коллективсем умĕнче нимĕн чухлĕ те шикленсе тăман – тĕнче шайĕнчи фестиваль-конкурсра «Халăх ташши» номинацире пĕрремĕш вырăн йышăннă. «Ылтăн çăлтăр» медале тивĕçнĕ. Элĕксен «Ладушки» ушкăнĕ чăннипех те пысăк çитĕнÿ тунă.