00:00 27 июня 2012 г.
Ульяна Чашкова 1931 çулхи авăн уйăхĕн 24-мĕшĕнче Изванка ялĕнче учитель çемйинче çуралса ÿснĕ. Элĕк шкулĕнче 10 класс пĕтернĕ. Учитель пулма ĕмĕтленсе Шупашкарти Чăваш патшалăх педагогика институтне математика факультетне вĕренме кĕрет, анчах килти пурнăç йывăртан тĕллеве пурнăçлама май килмест. 1951-мĕш çулта Йăлкăш вулавăшне ĕçе вырнаçать. 1955 çулта Ехремкасси вулавăшне ертсе пыма шанса параççĕ. Ульяна Çĕрпÿри библиотека техникумĕнчен куçăмсăр майпа вĕренсе тухать.
Илемлĕ те сăпайлă хĕре Качалав каччи Георгий Ананьевич Чашков куç хывать. 1956 çулта пĕр çемье чăмăртаççĕ. Ульяна Кирилловна концертсене те хастар хутшăнать.
Пĕтĕм пурнăçне çынсене кĕнеке вулаттарас, пĕлÿ парас ĕçпе çыхăнтарать. Тĕрлĕ мероприятисем хатĕрлет, ачасемпе те, ваттисемпе те пĕр чĕлхе тупма тăрăшать. Библиотека тытăмĕнче 39 çул ĕçлет. Ĕçри вăр-варлăхĕшĕн, кăмăлĕпе çаврăнăçулăхĕшĕн хисепленĕ ăна вулакансем. «Ĕç ветеранĕ» ята илме тивĕçнĕ.