00:00 25 июля 2012 г.
Элĕкри тĕп библиотекăн вулав залĕнче «Тăван ен историйĕ хăвăн аллунта» истори сехечĕ иртнĕ. Ăна Раççей историйĕн çулталăкне халалласа йĕркеленĕ. «Вучах» клубăн членĕсемпе шалти ĕçсен пайĕн отставкăри подполковникĕ, краевед Геннадий Михайлович Михайлов тĕл пулнă. Вăл «Чăваш милицийĕн историйĕ», «Астăвăм», «Следстви ирттернĕ...», «Элĕк энциклопедийĕ» кĕнекесене хатĕрлеме хутшăннă. Паянхи куна Геннадий Михайлович «Элĕк энциклопедийĕн» иккĕмĕш томне хатĕрлессипе материалсем пухать. Истори сехетĕнче краевед çÿлерех асăннă кĕнекесен презентацине ирттернĕ, хамăр тăрăхри паллă çынсем çинчен каласа панă. Мероприятие хутшăнакансем Г.Михайлова тулли кăмăлпа итленĕ, район историйĕпе çыхăннă кăсăклă ыйтусем панă. Çавăн пекех истори сехетĕнче «Элĕк районĕ: пулăмсемпе тата çынсем» слайд-презентаци кăтартнă.
И.ИЛЬИНА.