00:00 08 августа 2012 г.
Илья Тукташ поэт çуралнăранпа 105 çул çитнĕ ятпа Элĕкри тĕп вулавăшра «Тăван ят – Илья Тукташ!» тематика каçĕ иртрĕ.
Илья Тукташа халăхра лайăх пĕлеççĕ. Пирĕн ентешĕн пултарулăх еткерĕ анлă та пуян. Вăл сăвăсемпе юрăсем, поэмăсемпе драмăсем, повеçсемпе калавсем çырнă, юмахсемпе легендăсем хайланă. Унăн чылай сăввисем тăрăх юрăсем кĕвĕленĕ. Прозаик пулса вăл литературăна «Пĕрремĕш çĕнтерÿ», «Çамрăк колхозниксем» очерксемпе кĕнĕ. Ентеш вырăс писателĕсен произведенийĕсене чăвашла куçарнă.
Мероприятие килнисемшĕн Илья Семеновичăн пурнăçĕпе пултарулăхне пĕлме, унăн сăввисене итлеме питех те кăсăклă пулчĕ.
Тĕп вулавăш ĕçченĕсем вулакансемпе «Кам-ха вăл – Илья Тукташ;» викторина ирттерчĕç. Вĕсем ыйтусене туллин хуравсем пачĕç. Кунтах «Элĕк Енĕн самана сассиллĕ поэзийĕн классикĕ И.Тукташ» слайд презентацийĕ пулчĕ. Çавăн пекех «Çакăн пек пулнă пирĕн Тукташ» куравпа та паллашрĕç.