00:00 11 августа 2012 г.
Иртнĕ кунсенче Элĕк районне Совет Союзĕн Геройĕн Мирон Ефимовăн Лиля хĕрĕпе унăн мăшăрĕ Олег Борисович Былинкин килсе çитнĕ. Чи малтанах вĕсем М. Ефимов çуралса ÿснĕ Самушка ялĕнче пулнă.
Ентешĕмĕр 1915 çулхи çурла уйăхĕн 27-мĕшĕнче çуралнă. Вырăс Сурăмĕнчи пуçламăш шкула пĕтернĕ хыççăн Элĕкре пĕлÿ илет. Ăна 1931 çулта вĕçлет. 1936-1938 çулсенче М.Ефимов Ейскри çарпа-тинĕс авиаци училищинче ăс пухать, летчик-истребитель пулса тăрать.
Вăрçă вăхăтĕнчи паттăрлăхпа харсăрлăхшăн Мирон Ефимович Ефимова 1942 çулхи çĕртме уйăхĕнче Совет Союзĕн Геройĕн ятне панă.
Халĕ паллă ентешĕмĕр çуралса ÿснĕ çуртра Юрийпе Зоя Михайловсем пурăнаççĕ. Кил-хуçалăха çирĕп тытаççĕ. Лиля Мироновна çывăх çыннисемпе, хăнасемпе пĕрле ялта пĕçернĕ кукăль-çăмаха тутанннă, асăнмалăх сăн ÿкерĕннĕ.
Хыççăн Совет Союзĕн Геройĕн хĕрĕ Элĕкри литературăпа краеведени музейĕнче пулнă. Ашшĕне халалланă куравпа паллашнă.