00:00 22 августа 2012 г.
Çак кунсенче Мăн Вылăри Поликарп Никифоров хăйĕн 90 çулхи юбилейне паллă турĕ.
Вăл 1922 çулхи августăн 16-мĕшĕнче Мăн Вылă ялĕнче çуралса ÿснĕ. Шкулта пĕлÿ илнĕ. 1941 çулхи декабрьте çара ăсаннă. Молдави, Румыни, Венгри, Чехословаки çĕр-шывĕсенчи çапăçусене хутшăннă. Паттăрлăхшăн нумай наградисене тивĕçнĕ. Вăрçăран таврăнсан тăван колхозра ĕçлеме пуçланă. Бригадирта, кладовщикра, ферма заведующийĕнче мĕн тивĕçлĕ канăва тухичченех тимленĕ. Мăшăрĕпе Вера Петровнăпа икĕ хĕрпе тăватă ывăла ура çине тăратнă.
Юбилей ячĕпе вăрçă ветеранне район администрацийĕн пуçлăхĕн пĕрремĕш çумĕ Л.Никитина çирĕп сывлăх сунчĕ, РФ Президенчĕн В.Путинăн саламне тата парне пачĕ. Юбиляра ытти хăнасем те саламларĕç.