00:00 25 августа 2012 г.
Район администрацийĕн пуçлăхĕ А.Н.Куликов тыл ĕçченне Васса Арсентьевна Арсентьевăна 90 çул тултарнă ятпа саламланă.
Васса Арсентьевна 1922 çулхи çурла уйăхĕн 20-мĕшĕнче Хитекушкăнь ялĕнчи хресчен çемйинче çуралнă. Тавăтри пуçламăш шкулта пĕлÿ илнĕ. Унăн пĕтĕм пурнăçĕ тăван «Таутово» колхозпа çыхăннă. Васса Арсентьевна хăйсен ялнех качча тухнă. Упăшкипе пĕрле икĕ ача пăхса ÿстернĕ. Халĕ вĕсен 10 мăнукпа мăнукĕсен 3 ачи.
Кинемей хăйне пач та ватă çын тесе шутламасть. Унăн аллисем чăннипех те пур ĕçре те пит ăста: хăть те мĕнле çипуç та çĕлеме пĕлет, çăмран, çипрен тĕрлĕ япаласем çыхать. Пĕчченех пурăнать-ха Васса кинемей, ачисемпе мăнукĕсем вара ун патне кашни кун тенĕ пекех пырса çÿреççĕ, кил-терĕшри хуçалăхра пулăшаççĕ. Çулĕсем самаях пулин те ял пурнăçĕпе кăсăкланса тăрать хисеплĕ ватă, хаçатсем вулать.
Район администрацийĕн пуçлăхĕ тыл ĕçченне юбилей ячĕпе саламланă май Раççей Федерацийĕн Президенчĕ Владимир Путин ятран çырнă салама панă.