00:00 29 сентября 2012 г.
Райадминистрацин ЗАГС пайĕнче Татьянăпа Владимир Трофимовсен çемйинче çуралнă ачана регистрациленĕ. Мăшăрсем Ассакассинче пурăнаççĕ, Татьяна – сутуçă, Владимир – «Рабия» общество водителĕ.
Трофимовсен пысăк савăнăç: çемьене виççĕмĕш «кайăк» килсе çитнĕ. ЗАГС ĕçченĕсем çак телейлĕ саманта ахаль хăварман, ашшĕпе амăшне пепкене савăнăçлă лару-тăрура регистрацилеме чĕннĕ. ЗАГС пайĕн ертÿçи М.Николаева мăшăрсене хĕр пĕрчи çуралнă ятпа ăшшăн саламланă, ăна лайăх воспитани парса çитĕнтерме ăнăçу суннă, çурални çинчен калакан свидетельствăпа пĕрле асăнмалăх парне – фотоальбом панă.
Çакна палăртмалла, кăçал районта 156 ача çуралнă. Ку вăл районта демографи лару-тăрăвĕ лайăхланса пынине пĕлтерет.