14:35 23 октября 2013 г.
Нумаях пулмасть Муркаш районĕнчи Мăн Сĕнтĕрте потребкоопераци тытăмĕнче
ĕçлесе тивĕçлĕ канăва тухнă ертÿçĕсене пуçтарнă. Республикăри тĕрлĕ районсенчи
ĕç ветеранĕсен йышĕнче Элĕк салинче пурăнакан Раиса Давыдовна Давыдова та пулнă.
Вăл 16 çул ытла Элĕкри пахча çимĕç комбиначĕн ĕçне йĕркелесе пынă. Çак тапхăрта
пурлăхпа техника бази çĕнелсе пуянланнă, çĕнĕ цехсем хута кайнă. Тĕрлĕ çулсенче
хастарлăх кăтартнă аслă ăрури çынсене Раççей Федерацийĕн Тав хучĕпе чысланă.
Потребительсен кооперативĕн аталанăвĕнче пысăк тÿпе хунăшăн çак хисепе тивĕçнĕ
вĕсем.
Раиса Давыдова иртнĕ çул «РФ потребительсен кооперацине 180 çул» медале те
илнĕ. Унчченхи ертÿçĕ тивĕçлĕ канура пулин те килте вăхăта усăсăр ирттермест,
халĕ те пахча çимĕç комбиначĕн ĕçĕ-хĕлĕпе кăсăкланать, çамрăксене сĕнÿ-канаш
парать. Çавăн пекех обществăлла ĕçре те хастар. Районта ватăсен шкулне йĕркелесе
ертсе пырать.
АУ "Редакция Аликовской районной газеты "По жизненному пути"