08:24 23 ноября 2013 г.
Вăрçа хутшăннисен хисепĕ чаксах пырать пулин те пирĕн районта пур-ха вĕсем. Акă Андрей Аркадьевич Аркадьев ноябрь уйăхĕн вĕçĕнче 90 çул тултарать. Вăл Юнтапа ял тăрăхне кĕрекен Чулкаç ялĕнче çуралнă. Юнтапари çичĕ çул вĕренмелли шкула пĕтерсен ашшĕ-амăшĕпе пĕрле тăван колхозра тăрăшать, водительсен курсĕнчен вĕренсе тухать. Тăван çĕр-шывăн Аслă вăрçин пуçлансан Андрея фронта илсе каяççĕ. 1942 çулта вăл Ворошиловоградри авиаци училищинче пĕлĕвне туптать. А.Аркадьева Çурçĕр Кавказри фронта ăсатаççĕ. Кунта çапăçура пулнă самолетсене вăхăтра юсать.
Вăрçă чарăнсан 1948 çулта киле яраççĕ. Вăл «Звезда» колхозра, Анаткасри кирпĕч заводĕнче шоферта ĕçлет, хастарлăхшăн мухтав хучĕсене илме тивĕçлĕ пулать. Вăрçăри паттăрлăхшăн ăна орденпа тата медальсем парса чыс тунă.
А.ТИМОФЕЕВ,
районти ветерансен канашĕн председателĕ.
АУ "Редакция Аликовской районной газеты "По жизненному пути"