14:50 25 декабря 2013 г.
Вутлан ялĕнче пурăнакан Агафия Сидоровна Сидорова хăйĕн 90 çулхи юбилейне паллă турĕ. Сумлă хăнасем вăрăм ĕмĕрлĕ кинемее Раççей Федерацийĕн Президенчĕн Владимир Путинăн саламлă çырăвне вуласа пачĕç. А.Сидорова 1923 çулхи раштавăн 24-мĕшĕнче Вутлан ялĕнче кун çути курнă. Çамрăклăхĕ унăн хаяр вăрçă çулĕсемпе пĕр килнĕ. Ял çыннисемпе пĕрле вăл та уй-хир ĕçĕнче тăрăшнă. Çавăн пекех алăпа йывăç касса вутă хатĕрленĕ. Окоп чавнă çĕрте те хăйĕн тÿпине хывнă.
Вăрçă вĕçленсен çĕнтерÿçĕ салтаксем киле таврăннă. Çивĕч хĕре Александр Семенов асăрхать. 1946 çулта пĕр çемьене пĕрлешеççĕ çамрăксем. Вутлан ялĕнчех тĕпленеççĕ. «Волга» хуçалăхра ĕçлесех кил-çурт çĕнетеççĕ. Агафия Сидоровна фермăра, хуçалăх уй-хирĕнче тăрăшать. Унăн мăшăрĕ, Тăван çĕр-шывăн Аслă вăрçин инваличĕ, аслă конюхра ĕçлет.
Унтанпа чылай шыв-шур юхса иртнĕ. Мăшăрсем 11 ачана пурнăç парнеленĕ. Агафия Сидоровна Сидоровăна «Амăшĕ-Героиня» орден парса чысланă. Мăшăрĕ, вăрçă суранĕсем канăç паманран, пурнăçран ирех уйрăлнă. Апла пулин те хĕрарăм пуçне усман, малаллах талпăннă. Амăшне паян ачисем (Анатолий ывăлĕ ирех пурнăçран уйрăлнă), мăнукĕсемпе кĕçĕн мăнукĕсем хăйсен юратăвне парнелеççĕ.
АУ "Редакция Аликовской районной газеты "По жизненному пути"