08:12 09 июня 2015 г.
Кăçал августăн 4-мĕшĕнче район хаçачĕ тухма пуçланăранпа 83 çул çитет. Çавра çул мар паллах, анчах пирĕншĕн кашни кун сирĕнпе пулни хаклă.
Сакăр теçетке урлă каçрăмăр пулин те хальлĕхе хаçатăн хăйĕн гимнĕ çукки пăшăрхантарать. Чăваш Республикин Гимнĕн сăмахĕсене пирĕн ентеш Илле Тукташ çырнипе мăнаçланатпăр. Наци радиовĕ валли мухтав юррин сăмахĕсене каллех элĕксем çырчĕç. Республикăра иртекен хĕрÿ кĕрешÿре Элĕк салинчи Елизавета Иванова çĕнтерчĕ. Çакна шута илсе хаçат гимнĕн авторĕ те хамăр хушăранах тупăнасса шанатпăр. Çавăнпа та июнĕн 1-мĕшĕнчен пуçласа июлĕн 31-мĕшĕччен «Пурнăç çулĕпе» хаçатăн гимнĕ валли сăвă çыракансен конкурсне йĕркелетпĕр. Конкурса пурте хутшăнма пултараççĕ. Ĕçе хатĕрленĕ чухне çак йĕркене пăхăнмалла: текста чăвашла çырмалла, хушса юрламалли çавра пулмалла, калăпăшĕ тăватă çавраран иртмелле мар. Текстсене пичетлесе е ал вĕççĕн çырса редакцие çитермелле е электрон почтипе ярса памалла. Пирĕн адрес: Элĕк сали, Советски урамĕ, 35-мĕш çурт. Электрон адрес: smi03@cap.ru.
Иккĕмĕш конкурса сăн ÿкерме кăмăллакансене чĕнетпĕр. Сирĕн-тен «Çу кунĕсем «Пурнăç çулĕпе» пĕрле» темăпа сюжетлă сăн ÿкерчĕксем кĕтетпĕр. Конкурсăн тĕллевĕ – пирĕн вулакансем çуллахи кунсенче те район хаçачĕпе пĕрле пулнине кăтартасси, пултаруллă ентешсене хавхалантарасси. Ĕçсене пичетлесе е электрон мелĕпе редакцие кĕртсе памалла. Конкурса сентябрĕн 30-мĕшĕнче пĕтĕмлететпĕр. Чи ăнăçлă ĕçсене хамăр хаçатра пичетлесе пырăпăр.
Çĕнтерÿçĕсене редакцирен парнесемпе тата Хисеп хучĕсемпе чыслама палăртнă.
ХАÇАТ РЕДАКЦИЙĔ.
АУ "Редакция Аликовской районной газеты "По жизненному пути"