11:36 10 июля 2015 г.
Июлĕн иккĕмĕш вырсарникунĕнче Раççей почтин ĕçченĕсем професси уявне паллă турĕç. Кашни уяв савăнăçлă иртет, тата ун чухне пĕтĕмлетÿ тăваççĕ. Пирĕн районта пурĕ 16 çыхăну уйрăмĕ. Çак уяв умĕн, июлĕн 9-мĕшĕнче, Элĕкри ача-пăча библиотекинче çак тытăмра тăрăшса ĕçлекенсене чысларĕç.
Чи малтанах Çĕмĕрле почтамчĕн ертÿçи Фридрих Альштут сăмах каларĕ. Вăл пухăннисене Раççей почтин кунĕпе саламларĕ. «Паянхи йывăр лару-тăрура эсир вăй-хала шеллемесĕр плана тултарассишĕн тăрăшатăр. Çыхăну ĕçченĕн тĕп тĕллевĕ - хаçат çырăнтарасси тата пичет кăларăмĕсене халăх патне вăхăтра çитересси. Кăçалхи çур çулта эсир лайăх ĕçленĕрен плана 100 проценчĕпех тултартăмăр. Эсир пысăк ĕç пурнăçлатăр, çакăнпа чарăнса лармалла мар, темĕнле йывăр пулсан та маллалах талпăнмалла», - терĕ Фридрих Неселеневич. Вăл хăйсен ĕçĕнче тăрăшулăхпа палăрнисене ятранах асăнчĕ. Юнтапари çыхăну уйрăмĕнче ĕçлекен Надежда Родионовăна, Элĕкри çыхăну уйрăмĕн ертÿçин çумĕнче ĕçлекен Людмила Якимовăна, Мăн Этменти Любовь Григорьевăна, Кĕçĕн Тăванти Альбина Дмитриевăна тата Мăн Карачурари Валентина Ефремовăна Тав хучĕпе чысларĕ. Унсăр пуçне Тав çырăвĕсемпе Тени, Чăваш Сурăм, Мăн Этмен, Урпаш, Тавăт, Шĕмшеш, Мăн Вылă ялĕсенчи çыхăну уйрăмĕн ертÿçисене - Алина Ивановăна, Венера Александровăна, Алина Сорокинăна, Эмма Александровăна, Инга Порфирьевăна, Анжелика Кондратьевăна, Надежда Алексеевăна Тав çырăвĕпе хавхалантарчĕ, ĕçре ăнăçу сунчĕ.
Район администрацийĕн пуçлăхĕн пĕрремĕш çумĕ Лидия Никитина Раççей почтин кунне паллă тăвасси пирĕн районта йăлана кĕрсе пынине палăртрĕ. Почтальонсене ăнăçу, хавхалану, вăй-хал сунчĕ, район администрацийĕн пуçлăхĕн Хисеп хутне Мăн Вылăри Надежда Алексеева, Кивуйри Олимпиада Моторина, Шĕмшешри Валентина Чугунова илме тивĕçрĕç.
«Çыхăну ĕçченĕсем çырăнтару тапхăрĕнче уйăрмах канăçа çухатаççĕ - плана тултармалла-çке. Вĕсем яваплăха туйса пичет кăларăмĕсене çырăнтарассишĕн кашни киле кĕреççĕ. Тăрăшни сая каймасть паллах. Эпир сирĕнпе тачă çыхăнура ĕçленĕрен район хаçачĕ кашни вулакан патне çитет», - терĕ «Пурнăç çулĕпе» район хаçачĕн тĕп редакторĕ Марина Леонтьева. Вăл çырăнтару тапхăрĕнче уйрăмах хастар ĕçленĕ почтальонсене - Валентина Агафоновăна (Тавăт), Ирина Тихоновăна (Мăн Вылă), Анжелика Лисинăна (Ехремкасси), Клара Тимофеевăна (Юнтапа) Людмила Титовăна (Тени), Зоя Михайловăна (Ехремкасси), Светлана Васильевăна (Элĕк), Лидия Григорьевăна (Элĕк) парне тата Хисеп хучĕ пачĕ.
Раççей почтин кунне почтальонсем тулли кăмăлпа кĕтсе илчĕç. Кашнин сăн-питĕнче савăнăç, хавхалану, чунĕсенче вăй-хал тапса тăрать тейĕн. Вĕсен куçĕсенче хăйсен ĕçне чунтан парăнни тата юратни курăнчĕ.
Вера МОРОЗОВА.
АУ "Редакция Аликовской районной газеты "По жизненному пути"