15:49 09 мая 2016 г.
Тăван çĕршывăн Аслă вăрçи 1418 куна тăсăлнă. Вăйпитти арçынсем çапăçу хирĕнче тăшманпа çапăçнă, паттăрлăх кăтартнă, юн тăкнă, пуç хунă. Тылра вара вĕсен мăшăрĕсемпе ачисем Çĕнтерĕве çывхартма пулăшнă. Хуйхи те, савăнăçĕпе вилĕмĕ те юнашара çÿренĕ. Çапах та совет салтакĕсем çĕнтернĕ, усал тăшмана тĕп тунă. 1941-1945 çулсенчи вăрçă кашни çемьене пырса тивнĕ, ĕмĕрлĕхе йывăр суран хăварнă. Майăн 9-мĕшĕнче Тăван çĕршывăн Аслă вăрçинче Çĕнтерÿ тунăранпа 71 çул çитнине халалласа митинг иртрĕ.
Йăлана кĕнĕ тăрăх, районти ĕç коллективĕсем, шкул ачисем, ветерансем район администрацийĕнчен пуçласа «Хĕлхем» спорт шкулĕ патне çитиччен оркестр калакан савăнăçлă кĕвĕпе утрĕç. Уяв колоннине çамрăк армеецсем шарсемпе тата ялавсемпе кĕтсе илчĕç. Çул тăршшĕпех «Уяв ячĕпе! Çĕнтерÿ ячĕпе!» тесе кăшкăрни чуна çÿçентерчĕ пулин те, пирĕн асаттесемпе асаннесем хăйсен пурнăçне шеллемесĕр тăшмана хирĕç паттăрла çапăçса çĕнтерни мăнаçлантарчĕ.
Савăнăçлă митинга йĕркелÿ комитечĕн председателĕ, район администрацийĕн социаллă аталану, çамрăксен политикипе спорт пайĕн начальникĕ Эдуард Николаев уçрĕ. «Çак ахаль вăрçă пулман, вăл ырри усала çĕнтерекен пулăм пулнă. Усал та хăрушă вăрçăра 26 миллион ытла çын вилнĕ. Вĕсене эпир яланах асра тытăпăр. Вĕсем хальхи ăрăва тăнăç пурнăç парнелессишĕн пуçне хунă», - терĕ Эдуард Николаев.
Район çыннисене уяв ячĕпе Элĕк районĕн пуçлăхĕ, районти депутатсен Пухăвĕн председателĕ Владислав Волков, район администрацийĕн пуçлăхĕ Александр Куликов, Чăваш Республикин пурлăх тата çĕр хутшăнăвĕсен Патшалăх комитечĕн председателĕ Наталья Тимофеева, Чăваш Республикин Çар ĕç комиссариачĕн Муркаш тата Элĕк районĕсен пай начальникĕ Владимир Казаков, ĕç ветеранĕ Анатолий Тимофеев саламларĕç. «71 çул каялла совет салтакĕсем тăшмана паттăррăн çĕнтерчĕç. Паян эпир асаттесемпе мăн асаттесене, асаннесемпе мăн асаннесене аса илетпĕр. Ветерансем умĕнче пуçа таятпăр», - палăртрĕ Владислав Волков. «Çĕнтерÿ кунĕ - пирĕн халăхăн паттăрла ĕçĕ. Пирĕн районтан тăшманпа çапăçма 9115 çын тухса кайнă, вĕсенчен 4567-шĕ юнлă вăрçă хирĕнче выртса юлнă. Пирĕн тивĕç - Аслă Çĕнтерĕвĕн историйĕн кашни страницине упраса хăварса çитĕнсе пыракан ăрăва парасси, ветерансене пурăнма тивĕçлĕ условисем тăвасси», - терĕ Александр Куликов. «Çĕнтерÿ кунĕнче эпир вăрçăра пулнă салтаксене тата тыл ĕçченĕсене аса илетпĕр. Çулсеренех «Вилĕмсĕр полк» çĕнелсе пырать. Пире тăнăç пурнăç парнеленĕ ĕнерхи салтаксем сахаллансах пыраççĕ. Эпир вĕсене яланах асра тытар, манар мар», - сăмах илчĕ Наталья Тимофеева.
Элĕкри «Централизациленĕ клуб тытăмĕ» учрежденин пултарулăх коллективĕ халăх умне «Тавтапуç Çĕнтерÿшĕн!» театрализациленĕ представленипе тухрĕ. Районти вĕренÿ учрежденийĕсен çамрăк армеецĕсем тата Афган вăрçин ветаранĕсем парадра утрĕç. Хыççăн пурте культурăпа кану паркне çул тытрĕç. Митинга хутшăнакансем вилнисене асăнса пĕр минут шăп тăчĕç. Вăрçă ветеранĕсем, районти предприятисемпе организацисен, учрежденисен представителĕсем палăк умне чечексем хучĕç.
Майăн 9-мĕшĕ - пысăк та пĕлтерĕшлĕ уяв. Вăрçă кашни çемьене йывăрлăхпа тĕрĕслерĕ, анчах та фронтовиксен паттăрлăхĕ, тыл ĕçченĕсен чăтăмлăхĕ, пурте кар! тăрса Тăван çĕршыва хÿтĕлени тăшмана çĕнтерме пултарчĕ. Çĕнтерÿ кунĕ - вăрçăран таврăнайманнисемшĕн ĕмĕр манăçми палăк, çитĕнсе пыракан ăрушăн вара ырă тĕслĕх. Çак кун çулсеренех аякран аякка тăрса юлать пулин те унăн пĕлтерĕшĕ, паттăр салтаксен, ветерансен хисепĕ чакмасть. Пирĕн тăнăç пурнăçшăн ырми-канми кĕрешнĕ салтаксем, ветерансем, тыл ĕçченĕсем умĕнче эпир çĕре çити пуç таятпăр.
Вера МОРОЗОВА.
АУ "Редакция Аликовской районной газеты "По жизненному пути"