09:35 23 июня 2016 г.
Июнĕн 24-мĕшĕнче Элĕк районĕнче иртекен Республика кунне хатĕрленессипе ĕçсем вĕçленсе пыраççĕ. Çак кун уява килекенсене хăрушсăрлăхпа тивĕçтересси районти полици сотрудникĕсем çине тиенет. Республика шайĕнчи пысăк мероприятие пăтăрмахсемсĕр ирттерсе ярас тĕлĕшпе Элĕкри полици пайĕнче май уйăхĕн çурринчен ятарлă план туса хатĕрленĕ. Право йĕркине пăсма пултаракан, унччен те саккунпа «пĕр чĕлхерен» пулман граждансемпе ăнлантару ĕçĕсем ирттернĕ. Çавăн пекех ют çĕршывсенчен килнĕ граждансем экстремизмла ĕçсем тăвассинчен асăрхаттарас тĕлĕшпе кашнинпе уйрăм курса калаçнă, вĕсен шухăш-кăмăлне пĕлнĕ. Мероприятисем пулакан культура учрежденийĕсенче, халăх йышлă пухăнакан вырăнсенчен инçех мар пурăнмалли çуртсенче, выльăх-чĕрлĕх сарайĕсенче тĕрĕслев ирттеретпĕр.
Июнĕн 24-мĕшĕнче ир кÿлĕмех Шупашкарти кинологи центрĕнчен çынсем умне хăрушлăх кăларса тăратма пултаракан япаласене тупса палăртакан ятарласа вĕрентсе хатĕрленĕ йытă илсе килетпĕр. Мероприятисем пуçланиччен унпа çынсем пухăнакан пĕтĕм объекта, ун çывăхĕнчи лаптăксене тĕрĕслесе тухатпăр.
Уяв вăхăтĕнче районти 50 ытла сотрудник йĕркелĕхе сыхлĕ тата 10 çын резервра шутланать. Элĕксемпе пĕрлех Вăрнарти районсем хушшинчи полици пайĕн ĕçченĕсем те çак ĕçе кÿлĕнеççĕ. Вĕсемсĕр пуçне ирĕклĕ халăх дружинисене те явăçтаратпăр. Кÿршĕллĕ Вăрнар районĕнчи дружинниксем те килеççĕ.
Хăрушсăрлăхпа тивĕçтерес тĕлĕшпе Элĕкри этнопарка тата «Хĕлхем» ачасемпе çамрăксен спорт шкулĕн территорисене кĕнĕ чухне тĕрлĕ япала илсе кĕресрен çынсене тимĕр шыракан ятарлă хатĕрпе тĕрĕслесе кĕртетпĕр. Çавăнпа та çынсене пире ăнланма ыйтатпăр.
Республика кунĕнче çул-йĕр хăрушсăрлăхне те куçран вĕçертмĕпĕр. Ун чухне Шупашкартан килнĕ Патшалăх автоинспекцийĕн 3 ятарлă подразделенийĕ район центрĕнчи çул-йĕр çинчи йĕркелĕхе сыхлĕ. Ирхи 9 сехетрен пуçласа 17 сехетчен Элĕк салинчи Парк урамĕнчĕ 16-мĕш çуртран пуçласа полици пайĕн çурчĕ таран* Элĕкри «Центральный» лавккаран пуçласа «Суту-илÿ çурчĕ» патне çитиччен тата Колхоз урамĕнчи 1-мĕш №-лĕ çурт патĕнчен пуçласа «Суту-илÿ çурчĕ» таран çул хупатпăр. Çавăн пекех 18.30 сехетрен пуçласа 24 сехетчен «Кафетери» патĕнчен пуçласа Парк урамĕнчи 11-мĕш №-лĕ нумай хваттерлĕ пурăнмалли çурт патне çитиччен автотранспорта çÿретмĕç.
Уява килнĕ çынсем хăйсен машинисене ятарласа уйăрнă вырăнсене лартса хăварма пултараççĕ - Октябрь урамĕнчи 10-мĕш çурт çывăхĕнчи лапамра, пасар территорийĕнче тата Парк урамĕнчи нумай хваттерлĕ 11-мĕш №-лĕ çурта хирĕç вырнаçнă территоринче.
Çавăн пекех уяв мероприятийĕсем пыракан, халăх йышлă пухăнакан вырăнсенче Чăваш Республикин Министрсен Кабинечĕн 2012 çулхи ноябрĕн 14-мĕшĕнче кăларнă 481-мĕш №-лĕ Постановленийĕпе килĕшÿллĕн спирт хутăшĕллĕ шĕвексем сутма юрамасть. Кунсăр пуçне полици сотрудникĕсем çынсем йышлă пухăнакан вырăнсенче чĕлĕм туртакан çынсене Чăваш Республикин Министрсен Кабинечĕ 2016 çулхи апрелĕн 13-мĕшĕнче кăларнă 108-мĕш №-лĕ Постановленине тĕпе хурса 500 тенкĕрен пуçласа 1500 тенкĕ таран штраф хума та пултараççĕ.
Район çыннисемшĕн уяв лăпкă та савăнăçлă ирттĕр.
Н.МИТРОФАНОВ, районти полици пайĕн начальникĕн çумĕ.
АУ "Редакция Аликовской районной газеты "По жизненному пути"