11:19 05 июня 2018 г.
Хаçат-журнала кăçалхи 2-мĕш çур çулта илсе тăма çырăнтару кампанийĕ пырать ĕнтĕ. Çак тапхăрта эсир йăлана кĕнĕ йĕркепе почтальонсемпе тĕл пулма, çыхăну уйрăмĕсене çитсе çырăнма пултаратăр. Элĕк салинче пурăнакансен кăмăл пулсан редакцие килсех хаçата илсе тăма май пур. Ун пек те, кун пек те майлашăнмарĕ пулсан онлайн мелĕпе усă курма сĕнетпĕр. Компьютер умне ларса е телефон урлă http,//podpiska.pochta.ru сайта кĕрсе çăмăллăнах хаçатлă пулатăр.
Район хаçатне онлайн мелĕпе çырăнас текенсене хăш-пĕр сĕнÿсемпе паллашма сĕнетпĕр. Тĕп страницăра сире пĕчĕк чÿречере хаçат индексне е ятне çырма ыйтаççĕ. П4559 индекса е «По жизненному пути» ята кĕртсе «Пурнăç çулĕпе» хаçата тупатăр. Малалла сайтра ыйтнă пекех пускăчсем çине пусса тÿлев патне çитетĕр. Миçе уйăхлăха çырăнассине палăртса хаçатшăн тÿленине çирĕплететĕр. Пулчĕ те – эсир килтен тухмасăрах хаçатлă пултăр. Малалла почтальонсем эрнере икĕ хутчен сире хаçат çитерсе парĕç. Ку мелпе усă курса эсир хăвăр тăвансемпе пĕлĕшсене те хаçат парнелеме пултаратăр.
Çакна та палăртмалла: кашни çырăнтару тапхăрĕнчех «Ырăлăх йывăçĕ» акци иртет. Сирĕнтен кашниех социаллă учрежденисене (ваттисен çурчĕсене, ача çурчĕсене) кирек мĕнле хаçат-журнал та çырăнса пама пултарать. Ырă туни ырăпах таврăннине асра тытасчĕ.
Марина ЛЕОНТЬЕВА.
АУ "Редакция Аликовской районной газеты "По жизненному пути"