10:02 12 июня 2018 г.
Районти тĕп библиотекăра уявсене тивĕçлипе паллă тăвасси йăлана кĕчĕ. Раççей кунне халалласа кунта тĕрлĕ мероприяти иртрĕ. Раиса Гордеева ертсе пыракан коллектив «Раççей çинчен чун-чĕререн юратса» ятпа кĕнеке куравĕ йĕркелерĕ. Хыççăн кунти литературăпа усă курса - электронлă презентаци. Кунта шкул ачисем, аслă çулхисем те хаваспах хутшăнчĕç.
Информаци сехечĕ те пухăннисене хавхалану кÿчĕ. Мĕншĕн тесен тем хушăрах Чăваш Енĕн паллă вырăнĕсене «çитсе курма» май килчĕ. Юратнă тăван çĕршыв Раççей тивлечĕпе аталанса, вăй илсех пырать-çке пирĕн республика.
Раççей гражданинĕн тĕп документне - паспорт парасси те савăнăçлă лару-тăрура иртрĕ. 14 çул тултарнă çамрăксем малтанах Раççейĕн чăн-чăн гражданинĕсем пулма тупа турĕç. Хыççăн РФ Миграци службин районти уйрăмĕн ертÿçи Александр Васильев тивĕçлисене паспорт пачĕ. Раççей кунĕнче Куба гражданинĕ те РФ паспортне илме тивĕçни килĕшÿллĕ пулчĕ. Савăнăçлă мероприятие районти ЗАГС пайĕн начальникĕ Любовь Артемьева та хутшăнчĕ. Библиотека ĕçченĕсем Альбина Егорова тата Оксана Бархаткина хăйсен ĕçне лайăх пĕлни курăнчĕ.
АУ "Редакция Аликовской районной газеты "По жизненному пути"