08:34 06 июля 2018 г.
Ĕнер почта çыхăну уйрăмĕн заведующийĕсемпе почтальонсем Раççей почтин кунне уявлама Элĕкри ача-пăча библиотекине пухăнчĕç. Унта вĕсене Çĕмĕрлери почтамт начальникĕ Сергей Новичков професси уявĕпе саламларĕ.
Çыхăну ĕçĕ-хĕлĕнче йывăрлăхсем сахал мар. Çапах та ку тытăмри ĕçченсем чăрмавсене çĕнтерсе пыраççĕ. Халăх ыйтăвĕсене туллин тата вăхăтра тивĕçтерме тăрăшаççĕ. Çавна май Сергей Николаевич çыхăну отраслĕнче ырă тĕслĕх кăтартакансене ятранах асăнчĕ. Хисеп тата Тав хучĕсем парса чысларĕ. Вĕсем хушшинче - Римма Егорова (Чăваш Сурăм), Валентина Чугунова (Шĕмшеш), Алина Рыгалова (Тени), Августина Ермакова (Элĕк), Людмила Якимова (Элĕк), Ольга Герасимова (Тавăт), Светлана Васильева (Элĕк), Ольга Томашова (Юнтапа), Эмма Александрова (Урпаш), Галина Васильева (Элĕк) тивĕçрĕç.
Професси уявĕпе саламланă çĕрте район хаçачĕн редакцийĕ те аякра тăрса юлмарĕ. Мĕншĕн тесен почта çыхăну уйрăмĕсен ĕçченĕсемпе эпир тачă çыхăнса ĕçлетпĕр, пĕрлехи ĕçе пурнăçлатпăр. Район хаçатне халăх патне вăхăтра çитерме пулăшнăшăн «Пурнăç çулĕпе» район хаçачĕн тĕп редакторĕ Марина Леонтьева тав турĕ. Вăл çыхăну тытăмĕнче ăнăçлă ĕçлекенсене асăнмалăх парне пачĕ. Чыс-хисепе кăçал Элĕкри çыхăну уйрăмĕн ертÿçи Любовь Петрова, Мăн Этменти Алина Сорокина, Тури Карачурари Валентина Ефремова, Ехремкассинчи Зоя Михайлова, Ярхуньушкăньри Валентина Воинова тивĕçрĕç. Хаçатçăсем малашне те пĕр-пĕринпе тачă çыхăнса, умри кăлтăксене çĕнтерсе, пĕр шухăш-ĕмĕтпе вăй хурса ĕçлеме ырлăх-сывлăх сунчĕç.
А.СИЛИВЕСТРОВА.
АУ "Редакция Аликовской районной газеты "По жизненному пути"