22 декабря 2010 г.
Пĕчĕк Кăканар ялĕнчен тухсанах – «Авангард» хуçалăхăн производство центрĕ. Кунта ĕç шавĕ чарăнма та пĕлмен. Фермăсенче выльăх-чĕрлĕх йышлă усратчĕç. Нумай сĕтшĕн кĕрешÿ вăй илсех пынă, сысна пăхакансем те шав малаллах талпăннă. Çура илессипе, выльăхсене самăртассипе районта та малта пыратчĕç. Лашасем та йышлă тытатчĕç.
Чылай ял хуçалăх предприятийĕсем пек пĕтмерĕ, тытăнса пырать-ха «Авангард». Владимир Журавлев хресчен-фермер хăй çине илсен, çĕнĕ варкăш килчĕ хуçалăха. «Уй-хир ĕçĕ кăна мар, фермăсем те кирлĕ. Выльăх-чĕрлĕх отраслĕ тупăш кÿтĕр», – тенĕ çĕнĕлле ĕçлекен ертÿçĕ.
Халĕ, авă, выльăх пăхакансем яваплăха туйса, тивĕçе ăнланса ĕçлеççĕ. Фаина Редькова заведующи ертсе пынипе малаллах пăхаççĕ ĕçченсем. Ĕне ферминче, акă, хăйсен ырă йăлине малалла тăсаççĕ.
– Виçшерĕн икĕ сменăпа ĕçлетпĕр. Ку хуçалăхшăн, хамăршăн та меллĕ пек туйăнать. Кашнинех яваплăха ÿстерсе пыма хистет. Пирĕншĕн, дояркăсемшĕн, пушă вăхăт ытларах, килте ĕçлеме те майсем пур, – терĕç Нина Куликовăпа Глафира Трофимова.
Вĕсем ку хутĕнче пĕрремĕш сменăра. Фермăна ир-ирех килнĕ ĕçченсем, кун йĕркине пăхăнса, тислĕк хырса тухнă. Выльăхсене концентрат панă, хыççăн ирхи сăвăма кÿлĕннĕ. Ирхи ĕçсене пĕтĕмĕшпех вĕçлеççĕ е килĕсене васкаççĕ пĕрремĕш сменăрисем. Тепĕр ушкăн кăнтăрла иртни виçĕ сехетре килет те çиччĕччен тăрăшать. Кусем – Вера Никифорова, Оля Белкина тата Венера Пудовкина дояркăсем. Пĕр эрне çапла ĕçленĕ хыççăн черетленеççĕ вĕсем. Малтан ирхи сменăра вăй хунисем каçхи сменăна тухаççĕ. Çапла кашни кунах канса илме те май пур дояркăсен. Унсăр пуçне вырсарни кун та канаççĕ вĕсем. Ку вара графикпа килĕшÿллĕн пулса пырать. Пĕр ушкăнĕ каннă чухне теприсем хĕрÿ ĕçре.
Ĕнен сĕчĕ чĕлхи çинче тенине манмаççĕ Кăканар ферминче. Кăçалхи шăрăх та типĕ килнĕ çул выльăх апатне тулăхах хатĕрленĕ тееймĕн. Çапах та пур пеккипе перекетлĕ усă курсан ăнăçлах хĕл каçма май пур.
Акă ĕне витине тулли тиевлĕ прицеплă трактор пырса кĕчĕ те кормушкăсем çине силос хурса тухма пуçларĕç. Выльăхсене валли утă-улăм, кăшман, çĕр улми те уйăрнă. Пĕчĕккĕн пулин те пусыпкине те параççĕ. Выльăхсене апатпа тивĕçтерессипе уйрăм çынсем ĕçлеççĕ. Кусем Зоя Петрушкина, Лидия Якимова, Оля Белкина тата ыттисем те. Михаил Ферапонтов механизатор шанчăклă пулăшакан вырăнчех.
Автопоилкăна пăхса тăмалла-и, тислĕк тасатмалли транспортера юсаса ĕçе ямалла-и – чăрмав çук ферма ĕçченĕсемшĕн. Ку енĕпе тăватă-пилĕк çынтан йĕркеленĕ ушкăн вăй хурать. Вĕсем кăканарсене кăна мар, ытти фермăсене те тивĕçтереççĕ.
Фермăра ăратлăх ыйтăвне те татса панă. Техник-осеменатор хăйĕн ĕçне пĕлсе тăвать. Çавна май кĕтÿ йышĕнче хĕсĕр ĕнесем çукпа пĕрех.
Тăрăшса ĕçлекене хавхалантарни те кирлĕ. Анчах выльăх пăхакансене кирлĕ пек, вăхăтра тÿлени çук-ха. Дояркăсем шалу пĕчĕк пулнăшăн пăшăрханаççĕ.
Елена ТИМОФЕЕВА.