17 января 2011 г.
Ульянов ячĕллĕ хуçалăха ултă çул Светлана Александровна Порфирьева ертсе пырать. Паянхи кун фермăра 300-е яхăн выльăх. Валентина Пшанкова, Людмила Сергеева, Надежда Кондратьева 70 пуç ĕнене сăвассипе яваплă.
В.Пшанкова фермăра мĕн ачаранах ĕçлет. Унăн амăшĕ те О.Краснова кунта тăрăшнă, фермăра ĕçлесе тивĕçлĕ канăва тухнă. Л.Сергеева вара шкул хыççăн тÿрех ферма ĕçне кÿлĕннĕ. Н.Кондратьева кунта чи çамрăкки пулсан та пуян опытлă дояркăсенчен юласшăн мар-ха.
– Пĕлтĕр дояркăсем пĕр ĕнерен 4600 килограмм сĕт суса илнĕ, кăçал вара ку хисеп ытларах, – пĕлтерчĕ ферма заведующийĕ Оля Митрофанова. – Хуçалăхăн пăру илессипе те кăтарту лайăх. Выльăхсене çуллахи вăхăтра улăх-çаранра пăхас ĕçе те дояркăсем пурнăçласа пыраççĕ. Пысăках мар йышра туслăх хуçаланать. Пĕр-пĕр ĕçчене черетлĕ отпуска ярас пулсан унăн вырăнне тепри йышăнма хирĕç мар.
1960 çулсенче купаласа лартнă çуртсем кивелнĕ, ферма çурчĕсен тăррисенчен шыв та кайнă. Çавăнпах ĕнтĕ витесене юсаса çĕнетессине тимлĕх уйăрнă. Акă паян кунта 200 пуç выльăх валли вите тăваççĕ. Пăру витине те пĕлтĕр çеç хута янă.
Н.Пшанковпа С.Григорьева тислĕке ферма çывăхĕнчи купа çине турттараççĕ. Çак ĕçсене пĕтĕмпех лашапа пурнăçлаççĕ. А.Харитоновпа Г.Михеев вара выльăх валли лашапа апат турттарса килессине йĕркелесе пыраççĕ. Г.Михеев хуралçă тата скотник ĕçĕсене те пурнăçлать.
– Выльăхсене хĕл каçарма утă-улăм, сенажпа силос çителĕклĕ,– терĕ хуçалăх ертÿçи. – Пурĕ 173 тĕрке улăм хатĕрлерĕмĕр.
Йĕтем çинчи ĕç-хĕлпе паллашма та кăмăл турăм. Светлана Степанова кладовщик ку ĕçре 2005 çултанпа вăй хурать.
– Тырă-пула пухса кĕртес ĕçсем ăнăçлă иртрĕç, – паллаштарчĕ С.Степанова. – Кунта уйрăмах шкул ачисен тÿпи пысăк. Вырнă тырра типĕтсе, пуçтарса кĕртнĕ çĕрте юнашар ял çыннисем те маттур пулчĕç. Шураçсем çулсеренех пирĕн хуçалăха пысăк пулăшу кÿреççĕ. Çĕнĕ çул уявĕ иртсен йĕтем çинчи тыр-пула алассипе тимлĕпĕр. Чăнах та, Ульянов ячĕллĕ хуçалăхра пурте хăйсен тивĕçĕсене лайăх пĕлекенсем, чуна парса ĕçлекенсем. Арканма пуçланă хуçалăха паянхи пурнăçра ура çине тăратма йывăр пулнине аванах чухлать хуçалăх ертÿçи. Вăй-хала шеллемесĕр тимлени вара ăнăçу кÿретех.
Выльăх-чĕрлĕх продукцине ÿстерсе пырасшăн хуçалăхра тăрăшакансем. Машина-трактор паркне çĕнетесси çине те тимлĕх уйăраççĕ. Олег Иванов тракторист-механизатор хăйĕн тивĕçне ăнăçлă пурнăçлать. Ольга Алексеева бухгалтер ĕçĕсене туса пырать. Вăл Ульянов ячĕллĕ хуçалăхра 2002 çултанпа тимлет. Хуçалăхра ĕçлекенсене шалупа вăхăтра тивĕçтереççĕ.
К.Порфирьев çĕр хатĕрлессипе вăй хурса ĕçленĕ. Ывăлĕ те ку ĕçрен пăрăнман. Э.Андачковпа пĕрле акнă çĕртре тăрăшнă.
Вера МОРОЗОВА.