26 января 2011 г.
2011 çулхи çĕртме уйăхĕн 1-4-мĕшĕсенче Ульяновск облаçĕн территорийĕнче Пĕтĕм чăвашсен «Акатуй-2011» наци уявĕ иртĕ. Çакнашкал пысăк пĕлтерĕшлĕ мероприятие Федераци центрĕн тата Чăваш Республикин тулашĕнче пуçласа йĕркелеççĕ.
Унăн тĕп тĕллевĕ – чăваш халăхĕн йăли-йĕркине упраса хăварасси тата чĕртсе тăратасси.
Ульяновск облаçĕн Правительстви Чĕмпĕрте ирттерекен Акатуя хатĕрленмешкĕн пулăшма ыйтать. Хăвăрăн сĕнĕвĕрсене, шухăшăрсене йĕркелÿ комитечĕн адресĕпе ярса памалла. Чăваш халăхĕн, унăн пултаруллă çыннисен кун-çулĕпе, унăн йăли-йĕркипе, наци апачĕпе, литературипе, çитĕнĕвĕпе çыхăннă кирек мĕнле информаципе хыпар та усăллă пулĕ. Чи лайăх шухăшсене, сĕнÿсене конкурс йĕркипе палăртĕç. Çĕнтерÿçĕне Ульяновск облаçĕн кĕпĕрнаттăрĕн – Правительство Председателĕн Сергей Морозовăн асăну парнипе чыслĕç.
Текст, çавăн пекех сăн ÿкерчĕксемпе видеоматериалсене politik@ulqov.ru е çырупа çак адреспа ярса памалла: 432063, Российская Федерация, г. Ульяновск, ул. Ленина, д.1. Электрон çырăвĕн темине «Акатуй-2011» тесе çырмалла тата информаци параканĕпе çыхăнмалли майсене палăртмалла.
Хушма информацие Ç7 (8422) 41-31-48 телефонпа пĕлме пулать. Сĕнĕвĕрсене çавăн пекех Ульяновск облаçĕн Правительствин официаллă сайтĕнче те хăварма пултаратăр.
Пĕтĕм чăвашсен «Акатуй-2011»
наци уявĕн йĕркелÿ комитечĕ.