05 марта 2011 г.
Ехремкассинчи культурăпа кану центрĕнче халăх пултарулăхĕн «Юратнă тăван ен» фестивалĕн зонăри тапхăрĕ иртнĕ. Программăра Ехремкассинчи, Карачурари культурăпа кану центрĕнчи, Ассакассипе Юманлăх клубĕсенчи пултарулăх коллективĕсен чи лайăх номерĕсем пулнă. Ехремкассинчи культурăпа кану центрĕнче шкул ачисен «Çул – çăлтăрсем патне!» ÿкерчĕксен куравне йĕркеленĕ. Ăна Космонавтика çулталăкне халалланă. Культура çуртне кăмăл пуррисем пурте – ватăсемпе яшăсем те, шкул ачисемпе пĕчĕкреххисем те пынă. Концерт хор юрланипе пуçланнă. Курма пынисем кашни номере тăвăллăн алă çупса йышăннă. Уйрăмах вĕсене Анастасия Михайлова, Анжелика Лисина, Ирина Прокопьева, Аня Орлова юрлани-ташлани килĕшнĕ. Сцена çинче чăваш, вырăс тата шÿтлĕ çепĕç юрăсем янăранă. Çавăн пекех ташă ушкăнĕсемпе фольклор ансамблĕсем те хăйсен пултарулăхне кăтартнă.