05 марта 2011 г.
Элĕкри çыхăну уйрăмĕнче ĕç вĕресе тăрать. Тин çеç илсе килнĕ хаçат-журналсене почтальонкăсем вулакан патне çитерме пĕр-пĕрин хушшинче валеçеççĕ.
– Эпĕ Восточнăй, Парковăй, Сосновăй, Садовăй, Коммунальнăй урамсенче пурăнакан халăх валли хаçат валеçессипе яваплă, – терĕ кунта çулталăка яхăн почтальонкăра тăрăшакан Светлана Степанова.
Вăл нумай ача амăшĕ шутланать. Апла пулин те тăван тĕпренчĕкĕсене тивĕçлĕ воспитани пама та, юратнă ĕçре вăй хума та вăхăт тупать вăтăр çиччĕри хĕрарăм. Шартлама сивĕре те, йĕпе-сапара та урам тăрăх хаçат-журнал валеçсе çÿреме тивет.
– Ватти те, яшши те хаçат-журналпа туслă, – сăмаха малалла тăсрĕ Светлана Анатольевна. – Акă, сăмахран, тĕпел кукринче тутлă апат-çимĕç пĕçерме хаваслисем ытларах кулинари изданийĕсене ыйтаççĕ.
Çыхăнтару тапхăрĕнче почтальон ĕçне вырăна хуманнисем те пур иккен. Хăшĕ-пĕрисем алăксене питĕрсе илеççĕ, теприсем йыттисене кăларса яраççĕ.
– Çапах та хаçат-журналсăр кил çук. Почта килсе çитсен хаçат-журнала хăвăрт валеçетпĕр, – пĕлтерчĕ С.Степанова.
Почтальонсем сумкисемпе çула тухма хатĕр ĕнтĕ. Анчах та хĕрарăм кăштах тăхтарĕ-ха.
– Çыхăнтару тапхăрĕ – чи хĕрÿ вăхăт. Çавна эпĕ чун-чĕрепе туйса тăратăп, шанăçа тÿрре кăларассишĕн тăрăшатăп, – терĕ вăл.
Ĕçтешĕсем пулăшнипе çыхăну ĕçне хăвăртах алла илнĕ. Çуллахи вăхăтра хаçат-журнала кирлĕ вырăна часах çитерме ачисем те пулăшаççĕ.
– Кулленех экземпляр çумне экземпляр хушăнса пырать, çыхăнтару тапхăрĕ ăнăçлă вĕçленессе шанса тăратăп, – калаçăва вĕçлерĕ те С.Степанова пысăк сумка йăтса Элĕк урамĕпе утрĕ.
В.НИКИФОРОВА.