Публикации » Купăс чуна ăшăтать

13 марта 2011 г.

Нумаях пулмасть Шĕмшеш салинче пурăнакан Николай Илларионович Феофанов хăйĕн 60 çулхи юбилейне паллă турĕ. Вăл ырă та питĕ кăмăллă çын. Шĕмшеш тăрăхне кĕрекен Çĕнушкăн ялĕнче çуралса ÿснĕ. Салтак тивĕçне пурнăçланă хыççăн Шупашкар районĕн хĕрĕпе çемье çавăрнă. Хăйĕн юратнă мăшăрĕпе Николай Илларионович виçĕ ача – икĕ ывăлпа пĕр хĕр çуратса ÿстернĕ. Шел пулин те, Николай Илларионовичăн савнă мăшăрĕ вăхăтсăр çĕре кĕнĕ.

Н.Феофанов пурнăçри йывăрлăхсенчен хăрамасть. Чун йăпатмăшĕ унăн – купăс. Пĕчĕк чухнех вăл купăс калама хăнăхнă. Халĕ те ялта унăн купăсĕсĕр пĕр туй та иртмест. «Купăс чуна ăшăтать», – тет Çĕнушкăн ял çынни.