16 марта 2011 г.
Элĕкри культурăпа кану центрĕнче «Чиперкке ентешсем» илемлĕх конкурсĕ иртрĕ. Унта Элĕк, Тавăт, Шĕмшеш, Юнтапа ял тăрăхĕсенчи чипер те илемлĕ хĕрсем хутшăнчĕç. Вĕсенчен кашниех çĕнтерÿçĕ пулассишĕн тупăшрĕ.
«Эпĕ тата манăн тăван ялăм» конкурсра Элĕк ял тăрăхĕнчи Юлия Ильинана çитекенни пулмарĕ. Вăл хăйĕн вĕренĕвĕпе пултарулăхĕ çинчен те, çавăн пекех Элĕк салин историйĕпе паллă вырăнĕсем пирки сăвăласа каласа пачĕ.
«Интервью» конкурс çĕнтерÿçи – Шĕмшеш ял тăрăхĕнчи тавçăруллă та маттур Виктория Платонова, Шĕмшеш чиперкки Чăваш Республикин литературипе искусствине тата театрне аталантарас ĕçе пысăк тÿпе хывнă паллă ентешĕмĕрсемпе питех те хавхаланса паллаштарчĕ. Конкурса Виктория Тăван çĕршывăн Аслă вăрçин ветеранĕсене халалланă сăввисемпе килнĕ.
Тавăтри Анжелика Железнова вара курма пынисене араб ташшине хăйне евĕрлĕ ташласа тĕлĕнтерчĕ.
Тупăшуçăсем çавăн пекех хăйсем тутлă апат-çимĕç пĕçерме пултарнине кăтартрĕç, залрисене каç ĕнтрĕкĕнче тумланмалли кĕпесем тăхăнса савăнтарчĕç.
Районти илемлĕх конкурсĕнче Юнтапа ял тăрăхĕнчи Анастасия Александрова мала тухрĕ, Юлия Ильина «Элегантлă чиперкке», Виктория Платонова «Чи эрудициллĕ хĕр», Анжелика Железнова «Пуринчен те тавçăрулли» ята тивĕçрĕç.