21 марта 2011 г.
Вулакансем пĕлеççĕ ĕнтĕ, Геннадий Александрович Савельев – Мăн Ямаш çынни, Чăваш радиопередачисен тата республикăри хаçат-журнал редакцийĕсен штатра тăман активлă сотрудникĕ. Журналист, писатель, краевед Элĕк район хаçат редакцийĕпе те 1965-мĕш çултанпах çыхăну тытать. Унăн тăван тавралăх историйĕпе çырнă документла произведенийĕсем, ĕçпе вăрçă тата партипе комсомол ветеранĕсен кун-çулне уçса панă очерксем тивĕçлĕ вырăн йышăнаççĕ.
Çулталăк каярах, пичет ветеранĕ 60 çул тултарнă май, Шупашкарти «Новое время» типографире унăн 300 тиражлă 5-мĕш кĕнеки кун çути курнăччĕ. Юлашки вăтăр çул хушшинче çырса хатĕрленĕ 60 сăвă-юрă хăвăрт сутăнса пĕтрĕ. Уйăх каярах вара «Юрлатăп юрату çинчен» ятлă произведени тепĕр хут пичетленсе тухрĕ. Тĕрлĕ тĕслĕ, хитре те хытă хуплашкаллă кĕнеке малтанхинчен чылай хулăнрах: 144 страницăра сăвви-юрри те, сăнÿкерчĕксем те нумай, автор çинчен çырса кăтартнисемсĕр пуçне тата икĕ калав та пур.
А.СИЛИВЕСТРОВА.