Публикации » Çамрăксене çăлтăрсем чĕнеççĕ

21 марта 2011 г.

Республикăри Халăх пултарулăх çурчĕ ака уйăхĕн 12-мĕшĕнчен тытăнса çу уйăхĕн 15-мĕшĕччен хăйĕн 6х7 галерейинче ачасен сăнарлă искусствин «Çулçÿрев – çăлтăрсем патне» куравне ирттерет. Ăна Космонавтика çулталăкне халалланă. Унта хутшăнса Ураскилт шкулĕнчи 10-мĕш класра вĕренекен Александр Осипов тĕнче уçлăхĕпе çыхăннă икĕ ÿкерчĕк тăратнă: «Космос» тата «Марс çинче». Сăнарлă искусствăпа Саша мĕн ачаранах кăсăкланать. Вăл темиçе хутчен те районти конкурссене хутшăннă, парнесене тивĕçнĕ. Александр Осипов – Тури Выла ялĕнчен. Вĕсен çемйинче 4 ача, пурте ÿкерме-сăрлама юратаççĕ, спорт вăййисене те хутшăнаççĕ. Тĕслĕх кăтартаканни – хăйсен ашшĕ. Хĕл кунĕсенче вăл ертсе пынипе ял ачисем пĕвери юра хырса тасатса ярăнчăк ăсталанă. Кунта яш-кĕрĕм те, ачасем те хоккейла выляççĕ.