21 марта 2011 г.
50 çул каялла эпир Элĕкри вăтам шкултан вĕренсе тухрăмăр. 1961-мĕш çул мĕнпе асра юлнă-ха; Пире вырăс литературипе Афанасий Трофимович учитель вĕрентетчĕ. Пĕррехинче урока хаçат илсе килчĕ. Пирĕн моряксем Лăпкă океанра 40 кун хушши вилĕме çĕнтерни çинчен вуласа пачĕ. Хыççăн паттăрлăх пирки сочинени çырма хушрĕ.
Апрелĕн 12-мĕшĕнче каникула канма янăччĕ. Часах радиопа тĕнче уçлăхĕнче пĕрремĕш космонавт Юрий Гагарин пулни çинчен пĕлтерчĕç, вĕçев ăнăçлă вĕçленни çинчен хыпарларĕç.
1961 çулта укçа улăштарни те асра юлчĕ. Çăва тухсан, экзаменсене ăнăçлă тытнă хыççăн, нумайăшĕ хуланалла çул тытрĕ. Эпĕ тăван ялах юлтăм. Вырăсла сахал калаçнăскер, хулана кайма вăтантăм.
Виçĕ çул иртсен пурпĕрех вĕренме кĕтĕм, чăваш тата вырăс чĕлхипе литературине вĕрентекен учитель пулса тăтăм.
Алла диплом илсен, мĕн тивĕçлĕ канăва тухичченех учительте ĕçлерĕм. Хам ачаранах ĕмĕтленнине пурнăçа кĕртрĕм – ватлăхра та пулин çырма пуçларăм.
Юлия ПЕТРОВА,
Хирлеппуç ялĕ.