Публикации » Хĕлле те футболла выляççĕ

23 марта 2011 г.

Шăмат кун Етĕрне хулинче 1994-1995-мĕш çулсенчи çамрăксем хушшинче мини футболла выляссипе турнир иртрĕ. Унта сакăр команда хутшăнчĕ. Район чысне Элĕк шкулĕн спортсменĕсем хÿтĕлерĕç. Çивĕч кĕрешÿре пирĕн ентешсем турнир çĕнтерÿçи пулса тăчĕç.

Çак вăйăра каччăсенчен хĕрсем те кая юлмаççĕ. Çакна «Хĕлхем» физкультурăпа спорт керменĕнче иртнĕ хĕрсен ăмăртăвĕ те çирĕплетет. Турнира районти 4 команда хутшăнма кăмăл турĕ. Хĕрсем те мечĕк тапма ăста пулнине çирĕплетрĕç. Элĕк шкулĕн чиперккисем малти вырăна çĕнсе илме пултарчĕç. Площадка хуçисем иккĕмĕш, Элĕк ял тăрăхĕн спортсменĕсем виççĕмĕш вырăна тивĕçрĕç.

С.ЛАВРЕНТЬЕВ.