28 марта 2011 г.
Шкул пĕтерекен арçын ачасенчен чылайăшĕ милици сотрудникĕсем çине ăмсанса пăхнине, вĕсем пекех йĕркелĕх хуралçи пулма ĕмĕтленнине пытарма кирлĕ мар ĕнтĕ. Хальхи вăхăтра арçын ачасене çеç мар, хĕр ачасене те ку професси килĕшет. Шкулта лайăх ĕлкĕрсе пыракансене, психика тĕлĕшĕнчен çирĕп, спортпа туслă яш-кĕрĕмсене районти шалти ĕçсен пайĕ урлă тĕрлĕ вĕренÿ учрежденийĕсенче пĕлÿ пухма йыхравлатпăр.
Кăçал вун пĕрмĕш класс пĕтерекенсем РФ Шалти ĕçсен министерстви çумĕнчи çак вĕренÿ учрежденийĕсене кĕме пултараççĕ.
Раççейри Шалти ĕçсен министерстви çумĕнчи экономика хăрушсăрлăхĕн академине «Финанспа кредит», «Налук тата налук хуни», «Бухгалтери учечĕ, анализĕ тата аудит» факультетсене кĕме май пур. Асăннă учрежденинче 5 çул пĕлÿ пухмалла.
Çавăн пекех Санкт-Петербургри университетра бухгалтери учечĕпе аудит, психологи, çамрăксемпе ĕçлемелли ятарлă факультетсенче пĕлĕве ÿстерме май пур.
Чулхулари академинчи «Правăна сыхламалли ĕç-хĕл», «Юриспруденци» факультетсенче пилĕк çул вĕренмелле.
Орел хулинчи юридици институтĕнче правăна сыхлакан тата çул-йĕр хăрушсăрлăхĕн пулас сотрудникĕсене вĕрентсе хатĕрлеççĕ.
Воронеж хулинчи институтра, Саратоври шалти ĕçсен çарĕсен институтĕнче те вырăнсем пур.
Аслă пĕлÿ илес тĕллевлĕ çамрăксен (салтак кайса килнисем), 11 класс пĕтерекенсем районти шалти ĕçсен пайне кадрсен енĕпе ĕçлекен пÿлĕме килмелле. Кун пек чухне эпир вара мĕнле хутсем хатĕрлемеллине палăртатпăр, калаçу ирттеретпĕр.
Пулас абитуриентсен çÿлерех асăннă кирек хăш вĕренÿ учрежденине каяс пулсан та вырăс чĕлхи, математика, обществознанипе истори предмечĕсемпе экзаменсем тытмалла. Физкультурăпа та çирĕплĕхпе чăтăмлăха тĕрĕслеççĕ.
С.ПЕТРОВ,
шалти ĕçсен пайĕн кадрсем енĕпе ĕçлекен инспекторĕ.