06 апреля 2011 г.
«Молния» хуçалăх юхăнса арканнă хыççăн Ураскилт тăрăхĕнче, техника енĕпе илсен, пĕр вăхăт шăплăх хуçаланчĕ. Халĕ ялсене çĕнĕ варкăш кĕнĕнех туйăнать. Унта та кунта трактор-машина шавĕ илтĕнсе тăрать. Паллă ĕнтĕ, ял çыннисем тимлесех çурхи ака-суха ĕçĕсене хатĕрленеççĕ.
Чылай ял çыннисем пай çĕрĕсене харпăрлăха илчĕç. Хăйсене тивĕçекен утмăл сотăй лаптăксемпе та анлă усă курасшăн. Валерий Быков, Анатолий Миронов, Любовь Филиппова, Геннадий Мурзаев иртнĕ кĕркунне çĕре сухаллатарчĕç, кăçал вара акса хăварасшăн. Юрий Федоров, Иван Егоров, Николай Андреев та хăйсен лаптăкĕсенче çĕртме сухи туса хăварнă, ку уйсене курăксен вăррисене акма тĕллев лартнă.
Виталий Ефремов çемйи хресчен-фермер ĕçне вăйлатсах пырасшăн. Вĕсен çĕр лаптăкĕ 10 гектар таранах. Унта ĕçлеме «Беларусь» трактор та туяннă, ытти ял хуçалăх машинисем те пур. Çемье лаша та тытать. Пĕлтĕр выльăх апачĕ хатĕрленипе япăх мар ĕçлерĕç, люцерна утине чылаях янтăларĕç. Ефремовсен выльăх-чĕрлĕх картишĕ тулли. Ĕни хĕрĕх литр таранах сĕт парать, теççĕ. Сурăхсем, сысна та усраççĕ.
Роза Калмыкова пенсионерка та çĕнĕлле ĕçе сарсах пырасшăн. Унăн çемйи 5 гектар çĕр илнĕ. Пĕлтĕр люцерна çулса илчĕç.
Кăçал пай çĕрĕсемпе 28 кил хуçалăх усă курĕç. Николай Арланов, Геннадий Чадыков, Георгий Козлов, Валерий Филиппов, Генриета Александрова çĕр участокĕсене часах ĕçе кĕртĕç. Алена Филиппова «Молния» хуçалăхра агрономра вăй хуратчĕ. Халĕ хресчен-фермер ĕçне йĕркелесе ярассипе пуçарулăх кăтартать.
Ливерий ФЕДОРОВ.