06 апреля 2011 г.
Пуш уйăхĕн 27-мĕшĕнчен пуçласа 28-мĕшĕччен Чулхула пĕтĕм Раççейĕпех хăнасене пуçтарчĕ. Унта «Ашкăнчăк çуркунне» ятлă IV конкурс-фестивалĕ иртрĕ. Пурĕ 1900 ача хутшăнчĕ. Раççейри тĕрлĕрен хуласенчен 5 çултан пуçласа 25 çул тултарнă ачасемпе çамрăксем пычĕç.
Фестивале Элĕкри ача-пăча искусство шкулĕнчи «Ладушки» ташă ушкăнĕ те хутшăнчĕ. Вĕсен ертÿçи – И.В.Терентьева. «Ладушки» ташă ушкăнĕ конкурсра «Хореографи» номинацийĕнче палăрчĕ. Ача-пăча искусство шкулĕнчи вĕренекенсем «Çамрăксен чăваш ташшипе» тата «Флот çинчен ĕмĕтленни» ташăсемпе савăнтарчĕç. Элĕкри çамрăксем каллех пăхăр медальлĕ пулса тăчĕç. Унсăр пуçне 3-мĕш степеньлĕ диплом илсе килчĕç. «Ладушки» ташă ушкăнĕ тĕп парнене – сертификата тивĕçрĕ. Унпа виçĕ çын тÿлевсĕр майпа халăхсем хушшинче иртекен «Волга в сердце впадает мое» ятлă II конкурс фестивале хутшăнма пултарать.
Элĕкри ача-пăча искусство шкулĕн директорне З.Ф.Васильевăна тата ташă ушкăнĕн ертÿçине И.В.Терентьевăна вара тав хучĕсемпе чысланă.