09 апреля 2011 г.
Чылай çамрăка ăраскал, романтика тени мала чĕнет çав. Ахальтен мар ĕнтĕ яшсемпе хĕрсем хула еннелле туртăнаççĕ. Анатри Карачура ялĕнчи Вячеслав Андреев та, тракторист-машинист профессине илнĕ пулин те, Шупашкара иленнĕ.
Чăваш Енри чи пысăк çыхăну учрежденине – почтамта водителе вырнаçнă. Каччăна Шупашкартан кулленех район центрĕсене почтăпа янă. Вячеслав тивĕçе ăнланса тимлет, шанăçне тÿрре кăларсах пырать.
– Почтăра кăна мар, хула автопаркĕнче те ĕçлесе куртăм. Кунта вара техникăна юсавлăх енĕпе пăхса тăмаллаччĕ, – ĕç биографийĕпе паллаштарма тытăнчĕ Вячеслав Андреев.
Хулара пурăннă яш апатланма ытларах столовăйне çÿрет.
Кăнтăрлахи апата тăтăшах çÿрени хăй килĕштернĕ хĕр енне туртăма ÿстерсех пыма пулăшать. Вăрттăн юрату вăй илсех пыни каччăна хăюллăрах пулма хистет. Сăмах хушать, калаçу пуçарать апат илнĕ май яш. Чун çунтармăш хĕр-упраçĕ кÿршĕллĕ Красноармейски районĕнчи Карай ялĕнчен иккен. Вечăпа пĕр çулхиех тата, Лида тесе чĕннĕ ăна. Икĕ çамрăк чун çывăхлансах пынă май пĕрлешме те вăхăт çитнĕ. Хулара ĕçленĕ вăхăтрах авланать Анатри Карачура яшĕ. Çамрăксем пĕрлехи пурнăçа хуларах чĕртсе яраççĕ.
– Сакăр çул хулара поварта ĕçленĕ хыççăн ялах таврăнмалла пулчĕ, – тет халĕ кил хуçи хĕрарăмĕ Лидия Кирилловна.
Ятарласа вĕреннĕ, опытлă повара Карачура шкулне тутлă апат-çимĕç пĕçерме чĕнсе илнĕ. Шкулта кăна мар, «Авангард» хуçалăхра та чăн-чăн повар пулнине кăтартать Лидия Кирилловна.
– Халăха валли апат пĕçерсех вăйпитти вăхăта ирттертĕм, – пĕлтерчĕ Лидия Андреева.
Унăн мăшăрĕ Вячеслав Андреевич хулара водительте тимленĕ пулсан, ялта – механизаторта. «Хурçă утне» юсавлă тытнă, ăна тухăçлă ĕçлеттернĕ.
Çурчĕ-йĕрĕсем капмар та илемлĕ Андреевсен. Çĕнĕ кирпĕч çурт çĕклессишĕн Андрей ывăлĕ нумай вăй хунине асăнчĕç мăшăрсем. Вĕсен кĕçĕн ачи «Волгателеком» пĕрлешÿн Элĕкри уйрăмĕнче монтерта чылайранпа ĕçлет. Аслă хĕрĕ, Лариса, амăшĕ пекех, повар. Иккĕмĕшĕ, Алиса, Калининăри шкулта вĕрентекенре ĕçлет.
Кил хуçи, Вячеслав Андреевич, Упа çырмине ишĕлесрен çулленех йывăçсем лартассине тĕпе хурать.
С.ИВАНОВА.