13 апреля 2011 г.
Ĕçлеме ÿркенменнисенчен чылайăшĕ хресчен-фермер хуçалăхĕсене йĕркелет. Пĕри выльăх-чĕрлĕх ĕрчетет, тепри çĕрпе ĕçлет.
Ураскилт ял тăрăхĕнче те кун йышши çемьесем сахал мар. Валерий Николаев, Юрий Николаев, Анатолий Миронов, Любовь Филиппова, Геннадий Мурзаев пĕлтĕр çĕр лаптăкĕсене сухалаттарчĕç. Пай çĕрĕсемпе те ял çыннисем анлă усă курма пуçларĕç. Роза Калмыкова, тивĕçлĕ канура пулин те, алă усса ларма шутламасть. Иртнĕ çул пилĕк гектар çĕр çине люцерна акрĕ. Алина Ефремова вунă гектар çĕр çинче ĕçлерĕ. Çу кунĕсем шăрăх тăчĕç пулин те курăк çителĕклĕ таран çулса пуçтарма пултарчĕ. Паллах, пĕччен мар. Çак ĕçре килти «Беларусь» трактор чăн-чăн пулăшуçă вырăнĕнчех. Унăн хушма агрегачĕсем те пур. Пĕтĕм ĕçе трактор вăйĕпе пурнăçлаççĕ Ефремовсем. Кил-картинче выльăх-чĕрлĕхĕ те йышлă. Ĕне-пăру, сурăхсем.
Пай çĕрĕсемпе ĕçлессипе Ураскилтсенчен Тури Выла çыннисем те юлмаççĕ. Николай Ермаков ырă тĕслĕх кăтартать. Килĕ-çурчĕ кермен пек, ытти хушма хуралтăсем те хăтлă. 16 пуç сумалли ĕне усраççĕ. Пур ĕçе мăшăрĕпе тата ачисемпе пурнăçлаççĕ. Килти трактор, комбайн тата ытти техника ку чухнехи ĕçсене самай çăмăллатать. 43 гектар çинче нумай çул ÿсекен курăксене çулса илет Николай Ермаков. 30 гектар пай çĕрĕсем çинче тырă акать.
Асăннă ялтах Олег Ксенофонтов та фермер ĕçне йĕркелесе янă. Çамрăк пулсан та хăйĕн хуçалăхне йĕркеллĕ тытса пырать. Ксенофонтовсен те килте техника пур. Çу кунĕсенче кил хуçин вăхăчĕ уй-хиртех иртет. 30 гектар çĕр çинче ĕçлемелли сахал мар-çке. Ĕçе юратакан çамрăк хăйĕн çĕр лаптăкĕпе тĕрлĕ енлĕ усă курма тăрăшать. Çулса типĕтнĕ курăка киле валли çителĕклĕ хатĕрлесе çитерсен ял халăхне сутать. Ĕнесемпе пăрусем тата сурăхсем çемье тупăшне ÿстерме пулăшаççĕ.
И.ИВАНОВА.