16 апреля 2011 г.
Юрий Алексеевич Гагарин космоса çĕкленнĕренпе 50 çул çитрĕ. Элĕкри литературăпа краеведени музейĕнче «Космос – дорога без конца и края» курав иртрĕ. Хыççăн литературăпа краеведени музейĕнче Ваттисен шкулне çÿрекенсемпе тĕл пулу пулчĕ. Чи малтанах уяв программине Ваттисен шкулĕн ертÿçи Клавдия Порфирьевна Степанова уçрĕ. Элĕкри вăтам шкулти истори предметне вĕрентекен В.Л.Михайлов курма килнисене çынсем тĕнче уçлăхне вĕçме вĕренни çинчен каласа пачĕ. Элĕкри вăтам шкулта 7 «б» класра ăс пухакан Н.Никитин С.П.Королев çинчен, 7 «а» класри М.Николаев К.Э.Циолковский тĕп конструктор çинчен доклад турĕç. Арçын ачасем ватăсене хăйсен аллипе ĕç урокĕнче ăсталанă тĕнче уçлăхĕн карапĕсен макечĕсемпе паллаштарчĕç. Çавăн пекех физика вĕрентекенĕ М.В.Дмитриева хатĕрленĕ тĕнче уçлăхĕ çинчен ятарлă стенд пурне те килĕшрĕ.
Тĕл пулура чăваш космонавчĕсем пирки те сăмах хускатрăмăр. Çапах та Ю.А.Гагарин çинче ытларах чарăнса тăтăмăр. Ветерансен хорне çÿрекен Г.К.Терентьев чăваш космонавчĕсен пурнăçĕнчи чи интереслĕ саманчĕсем çинче чарăнса тăчĕ. К.П.Степанова чăваш поэчĕсем космонавтсем çинчен çырнă сăвăсемпе паллаштарчĕ, куракансемпе викторина ирттерчĕ. Çавăн пекех Чăваш Республикин тава тивĕçлĕ учителĕ В.И.Михайлова А.Г.Николаевпа тата П.Р.Поповичпа тĕл пулнă самантсене аса илсе каласа пачĕ.
О.АЛЕКСЕЕВА,
Элĕкри литературăпа краеведени
музейĕн директорĕ.