18 апреля 2011 г.
Упăшкипе арăмĕ, ашшĕ-амăшĕпе ачисем пĕр чĕлхе тупма пĕлсен çемьере тăнăçлăх, ăнланулăх пулатех.
Çулавăçра пурăнакан Логиновсен çемйи пĕчĕкех мар. Мăшăрсем тăватă ачана пурнăç парнеленĕ. Кил хуçисем тирпейлĕхе, хитрелĕхе хаклаççĕ. Çуллахи вăхăтра палисадникĕнче тĕрлĕрен чечексем ешереççĕ. Анкартийĕ те пахча çимĕçпе пуян.
Логиновсем 1999 çулта илемлĕ те капмар кил-çурт çавăрнă. Мăшăрсем ытти хуралтăсене те çĕнетнĕ, çĕнĕ сăн кĕртнĕ.
– Упăшка пĕртăванĕсенчен асли пулнăран, уйрăлса тухма тиврĕ. Малтанлăха, çамрăксене, паллах, ура çине тăма питĕ йывăр. Юрать-ха, тăвансем, тус-юлташсем чылай пулăшу пачĕç, – аса илчĕ кил-çурт çавăрнă çулсене Наталия Венедиктовна.
Чăнах та, ял çыннин тимлемелли сахал мар. Ан ÿркен, ĕлкĕр кăна. Йышпа кар тăрса ĕçлесен вара ÿсĕмĕ те куç умĕнчех.
Наташăпа Александр ăнсăртран паллашнă. Кĕтмен çĕртен паллашса туслăх часах юратăва куçнă. Наталия Венедиктовна Анатри Юлăшра 1974 çулта çуралнă. Вырăс Сурăм шкулĕнчен вĕренсе тухсан ăс пухма малалла каяйман. Анаткас Çулавăç каччипе паллашнă та часах унăн мăшăрĕ пулса тăнă. Александр Гурьевич Вăрнарта выльăх тухтăрне вĕреннĕ. Çамрăк чухне тăван хуçалăхра тăрăшнă. Ачаллах пуртă тытнă. Ÿссе çитсен те пуртă-пăчкăпа аппаланма юратнă. Ялта ĕç çукран ют хуласемпе облаçсене ĕçлеме çÿрет. Наталия Венедиктовна Çулавăç тăрăхне качча килсен пĕр вăхăт колхозра, унтан чылай çул дояркăра тимлерĕ. Халĕ вара килти хуçалăха аталантарассишĕн тăрăшать.
Логиновсем выльăх усраса тупăш илме май пуррине тĕпе хураççĕ. Выльăхсен йышне те ÿстереççĕ кил хуçисем.
Малашлăхшăн тăрăшакан, нимĕнле ĕçрен те ÿркенмен çынсем çеç тулли пурнăçпа пурăнма пултараççĕ.
Л.ФИЛИППОВА,
Çулавăç ялĕ.