20 апреля 2011 г.
Нумаях пулмасть РФ Патшалăх Думин депутачĕ П.Семенов Элĕк районĕнче пулчĕ. Вăл чи малтанах район администрацийĕн пуçлăхĕпе Л.Читнаевпа курса калаçрĕ.
Чăваш Сурăм шкулĕнче 9-11 классенче вĕренекенсемшĕн парламентари урокĕ яланлăха асра юлĕ. Урока истори учителĕ мар, РФ Патшалăх Думин депутачĕ Павел Семенов ирттерчĕ.
Шкул ачисем çĕршыв парламенчĕн тата саккун кăларакан органсен ĕçĕ-хĕлĕ çинчен пĕлчĕç. Павел Владимирович нумай çĕннине каласа пачĕ. Вĕренекенсем саккунсем мĕнле çуралнине, вĕсем практикăра пурнăçа мĕнле кĕнине лайăх ăнланчĕç, ыйтусем çине те хуравсем илчĕç.
П.Семенов депутат экзаменсене ăнăçлă тытма ырлăх-сывлăх сунчĕ.
Шкул директорĕ Надежда Давыдова вĕрентÿ учрежденине пулăшу панăшăн тав турĕ. Çакна каламалла: ку шкула 2007 çулта депутат 10 мăшăр пластик йĕлтĕр парнеленĕ тата медицина кабинетне кирлĕ хатĕрсемпе тивĕçтерме спонсор пулăшăвĕ панă. Павел Владимирович малашне те шкулпа çыхăну тытассине, çавăн пекех май килнĕ таран пулăшассине шантарчĕ.