23 апреля 2011 г.
Çурхи уй-хир ĕçĕсем пуçланиччен шутлă кунсем кăна юлчĕç. Çак хĕрÿ тапхăра ăнăçлă иртересси техника юсавлă пулнинчен уйрăмах нумай килет. Çавна май халĕ тракторсемпе прицепсене, ял хуçалăх машинисене уй-хире тухма мĕнле хатĕрленине тĕрĕслессипе ĕçсем анлă сарăлчĕç.
«Правда» хуçалăхри машина-трактор паркĕнче юсав ĕçĕсем хĕрсех пыратчĕç. Кунта тĕрлĕ техника – 19 единица, çав шутран урапаллă тракторсем 6, гусеницăллисем – 3, прицепсем – 6. Анчах та пур техникăна та çур-аки ĕçĕсене пурнăçлама хатĕрлесе çитерейменни курăнчĕ. Техника тĕрĕслевĕ витĕр ултă Беларусь, тепĕр ДТ-75 трактор кăна тухрĕç. Пушар хăрушсăрлăхĕ енĕпе кирлĕ хатĕрсем те çук-ха. Кадрсем енĕпе те ыйтăва пĕтĕмĕшпех татса пани палăрмарĕ.
«Звезда» хуçалăхра техника пурĕ 24 единица шутланать пулсан, тĕрĕслев витĕр 10 трактор: урапаллисем – 6, гусеницăллисем – 4 кăна тухрĕç. Механизаторсем те çителĕклĕ мар. «Авангард» хуçалăхра техникăна юсаса йĕркене кĕртес ĕçе пачах та тытăнман. 25 единицăран пĕри те уя тухма хатĕр мар.
«Новый путь» хуçалăхăн виçĕ уйрăмĕнче те техникăна ĕçе хатĕрлессипе лайăх ĕçлени яр уççăнах курăнчĕ. Тракторсене пушара хирĕç кĕрешмелли хатĕрсемпе, аптечкăсемпе те комплектланă.
С.Волков ертсе пыракан хресчен-фермер хуçалăхĕн ĕçченĕсем паян тесен паян уй-хире тухма хатĕр.
В.Узянов хуçалăхĕнче те тракторсем пурте юсавлă. «Сельхозхими» пĕрлешĕвĕ вара техника тĕрĕслевĕ ирттермелли графика пăхăнмарĕ. Кунти обществăлла смотра тепĕр срока хăварма тиврĕ.
Çапла асăрхаттарса каласшăн: тĕрĕслеттермен техникăна уй-хире кăларма, унпа усă курма юрамасть. Йĕркене пăхăнманнисене административлă майпа явап тыттарма тивĕ.
К.МАЙОРОВ,
районти гостехнадзор инспекцийĕн начальникĕ.