06 мая 2011 г.
Выльăх-чĕрлĕх ĕрчетесси – районти тĕп отрасль. Кунта вăй хуракансен çулталăкăн кирек хăш вăхăтĕнче те канăç çук. Иртнĕ виçĕ уйăхри кăтартусене тишкерсен ял хуçалăх предприятийĕсен, хресчен-фермер, уйрăм çынсен хуçалăхĕсен ĕçĕ-хĕлĕ ума яруççăнах тухса тăчĕ.
Мĕн пур категориллĕ хуçалăхсене илсен, аш-какай пĕтĕмпе 1122,6 тонна туса илнĕ. Пĕлтĕрхи пĕрремĕш кварталтипе танлаштарсан – 97 процент, продукцие 34,3 тонна сахалтарах хатĕрленĕ.
Уйрăммăн илсен вара ял хуçалăх предприятийĕсем иртнĕ çулхинчен чылай лайăхрах ĕçлени курăнать. Аш-какая 116,2 тонна вырăнне 135,9 тонна (117 процент) туса илнĕ. Ку ÿсĕмре «Новый путь» ял хуçалăх кооперативĕн тÿпи уйрăмах пысăк. «Правда», «Звезда», «Алмаз», «Витязь», «Партнер» хуçалăхсен кăтартăвĕсем те иртнĕ çулхинчен чылай лайăхрах.
Килти хуçалăхсем пĕлтĕрхи пĕрремĕш кварталта 1040,7 тонна аш-какай туса илнĕччĕ, кăçал – 985,6 тонна (94,7 процент) кăна. Урăхла каласан, хушма хуçалăхсем продуктивлăха 55 тонна ытла чакарнă.
Сĕте мĕн пур категориллĕ хуçалăхсенче, 5422,4 тонна (104,1 процент) хатĕрленĕ.
Ял хуçалăх предприятийĕсен кăтартăвне палăртма кăмăллă. Иртнĕ виçĕ уйăхра сĕте пĕлтĕрхи 970,1 тонна вырăнне 1007,9 тонна (103,4 процент) туса илнĕ.
Килти хуçалăхсенче сĕт 4394,8 тонна (104,1 процент), иртнĕ çулхипе шутласан – 174,7 тонна нумайрах илнĕ.
Иртнĕ тапхăрта, шел пулин те, ĕне выльăхсен йышĕ чакнă. Мĕн пур категориллĕ хуçалăхсенче 68 пуç таран сахалланнă. Уйрăм çынсен ку хисеп 138-а çитнĕ. Ял хуçалăх предприятийĕсенче вара кăтарту пачах та урăхла. Хĕл йывăр килнине пăхмасăр, хуçалăхсем ĕне выльăх шутне 64 пуç ÿстернĕ.
Районта сысна «хисепрен» тухни вара куçкĕретех. Пĕрремĕш кварталта вĕсен шучĕ 661 пуç таранах сахалланнă. Ку ÿкерчĕк килти хуçалăхсенче уйрăмах палăрать. Пĕлтĕр сыснасем 1034 пуç шутланнă пулсан, кăçал – 586 кăна.
Ку чухне сурăхсен кĕтĕвĕсем те пысăкланса мар, пĕчĕкленсе пыраççĕ. Ку йышши выльăхсем хăш-пĕр ялсенче вуçех те çук ĕнтĕ. Ахальтен мар иртнĕ виçĕ уйăхра сурăхсем 413 пуç таранах чакнă. Ял хуçалăх предприятийĕсенче сурăхсемпе качакасем 56 пуçран 353 пуçа çитни – ырă улшăну.
Районта лашасем пĕтĕмпе те 100 пуç ытларах кăна. Янаварсен шучĕ килти хуçалăхсенче (75 пуç) уйрăмах нумай чакнă.
Е.САВЕЛЬЕВА.