06 мая 2011 г.
Çурхи кун çулталăк тăрантарать тесе ахальтен каламан ватăсем. Çур акине мĕнле шайра ирттеретĕн, çавăн пек тухăç илетĕн. Çак пысăк пĕлтерĕшлĕ тĕллеве пурнăçлама «Алмаз» общество ĕçченĕсем тĕплĕн хатĕрленнĕ, техникăна вăхăтра юсанă. Халĕ акă уй-хир тракторсен шавĕпе тулнă. Нумай çул ÿсекен курăксене сÿреленĕ, минераллă удобренисемпе апатлантарнă. Кĕрхи культурăсем çине те тимлĕх уйăрнă. Общество ĕçченĕсем хăйсене шанса панă ĕçе яваплăха туйса пурнăçлани лайăх палăрать. «Условисем пур, мĕншĕн ĕçлемелле мар», – теççĕ ĕçченсем.
– Кăçал çурхисене икçĕр гектар ытла акса хăварасшăн. Çунтармалли-сĕрмелли материалсем çителĕклĕ. Пахалăхлă вăрлăх акса тухăç ытларах илме палăртрăмăр, – терĕ Геннадий Денисов ертÿçĕ.
«Алмазра» çур акине кĕске вăхăтра вĕçлесшĕн.