06 мая 2011 г.
Кашни ялтах пур ун пек çынсем – ĕçченлĕхĕпе, ырă кăмăлĕпе ыттисенчен уйрăлса тăраканнисем. Янкурас ялĕнче пурăнакан Юрий Ивановичпа Галина Федоровна та вĕсен шутĕнче.
Мăшăрсем çемье çавăрнăранпа кăçал вăтăр пĕр çул çитнĕ. Мĕн-мĕн курман-ши вĕсем çак çулсенче;
Çемье пуçĕ Юрий Ржанов Ураскилт ялĕнче çуралса ÿснĕ. Мĕн ачаранах хăйĕн пурнăçне ялпа çыхăнтарма ĕмĕтленнĕ. Мăшăрланнă хыççăн пĕр вăхăт тăван ялта пурăннă хыççăн арăмĕ çуралса ÿснĕ яла Янкураса пурăнма куçса килнĕ. Юрий Иванович тĕрлĕ çĕрте вăй хунă. Вун пилĕк çул ял хуçалăхĕнче слесарьте, каменщикра тимленĕ. Вăрман ĕçлеме те çÿренĕ.
– Калама çук шартлама сивĕсем пулнă вăл вăхăтра, – аса илет çамрăклăх çулĕсене Ю.Ржанов. – Юлташсемпе вăрман касаттăмăр. Ал-урана кăшт та пулин ăшă пултăр тесе ĕçленĕ вăхăтрах эрех ĕçеттĕмĕр. Ку, паллах, мăшăра килĕшместчĕ. Çапла вара Ураскилтрен Янкураса куçса килтĕмĕр. Кунта пурăнма пуçласан пĕр черкке эрех те тутанса пăхман, халĕ те ĕçместĕп. Юрий Ржанов Мускавра Федераци çуртĕнче стройкăра та ĕçлесе курнă.
– Мăшăрпа сенкер экран умĕнче ларнă чухне Мускаври хам курнă депутатсене кăтартатăп та Галя манран тĕлĕнет, ĕненмест пулмалла, – хăпартланса калаçать Ю.Ржанов. – Хам вара Федераци çуртне тепре кайса курса Раççей Президентне алă пама ĕмĕтленетĕп.
Шÿтлеме юратаканскерĕн сăмахĕсем те чăн, те суя. Ĕненме те йывăр.
– Чĕрере тунсăх пулсан Юра мана хавхалантарма пултарать. Чунри тĕксĕм туйăмсене çийĕнчех хăваласа ярать, – тет мăшăрĕпе мухтанса Галина Федоровна.
Г.Ржанова нумай çул фермăра ĕçленĕ. Улма-çырла комбинатĕнче те тăрăшнă. Халĕ Галина Федоровна тивĕçлĕ канура. Апла пулин те нихăçан та ахаль лармасть вăл. Ачисем валли алсиш-нуски çыхать. Мăшăрĕпе вăл хĕрпе икĕ ывăла кун çути парнеленĕ. Кил хуçи арçынĕ çуллахи вăхăтра «Журавлев» хресчен-фермер хуçалăхĕнче ĕçлет, сортировщикра тăрăшать. Хĕллехи кунсенче вара килти хуçалăхра выльăхсем патĕнче аппаланать, кÿршĕсене тĕрлĕ ĕçсем пурнăçлама пулăшать.
– Çуралнă кунпа эпĕ çемьепе пĕрле икĕ уяв паллă тăватăп, – шÿтлесе калаçать Ю.Ржанов. – Хĕрарăмсен кунĕнче çуралнă эпĕ.
Ĕçе юратакан, ял-йышпа туслă пурăнакан, кÿршĕ-аршăпа килĕштерекен çын мĕн ĕлĕкренех хисепре пулнă.
– Пĕр-пĕрне каçарма пĕлни, çынна йывăр вăхăтра пулăшни пысăк вырăн йышăнать. Çакăн пек мар-и, Юра; – терĕ Галина Федоровна упăшки çине тинкерсе.
Лешĕ пуçĕпе сулса килĕшрĕ. Мăшăрĕн сăмахĕсенчен иртменнине, унăн шухăшне пĕлмесĕр ĕçе пуçăнманнине палăртрĕ Ю.Ржанов.
Мăшăрсен ĕçченлĕхĕпе тирпейлĕхĕ пÿрт ăшчикĕнче те курăнать. Юрий Иванович та кил-çурта тирпейлес ĕçре мăшăрне пулăшма хавас.
В.НИКИФОРОВА.